Foodie 生活雜誌

食完早餐後，襯王子未起身，陪屋主的女兒去後園玩，順便攤在一旁放空，之後就跟屋主道別，離開小木屋了。喺香港已訂左位食午餐，日本有好多餐廳都喺山卡罅，食餐飯似尋幽探秘，好有趣。食完後想起昨日經過道之駅攞左張木工店的單張，按圖索驥去參觀，結果因為太鍾意，流連忘返之下買左一堆裝飾品至離開，好滿足。之後就去今晚去Glamping了。

今次北海道之旅，住宿都係旅遊點之一。之前去親美瑛都係住pension，今次想試下住屋仔。但要揾全間屋又啱budget的唔容易，結果揾左呢間同屋主一家同一屋簷下，佢住樓下我住樓上的小木屋。小木屋高兩層，樓上全層俾哂我，有兩房，浴厠，樓下客廳跟屋主共用，包早餐，不可煮食，但可用微波爐翻熱食物，不過我唔想搞到佢廚房，都係出外搞掂。屋主一家住木屋的後半部，基本上唔會影響到大家，但始終係木屋，幾應聲，我怕嘈到佢，成日要就住就住，有點不自在。

朝早趁王子仍熟睡中，食完早餐自己去田園行，天氣好好，獨享太陽花田。王子醒後就出發，出發前屋主知道我想去白金温泉，見佢偷笑一下，話只有遊客至去，話當地人都去遠少少的吹上温泉，我當然立即轉塲，所以今日的行程就係遊車河，食嘢同浸温泉。

今晚住美瑛，距離旭岳唔使一個鐘頭車，但我想睇花，要知道九月的北海道花季已過紅葉未到，選擇已經少，加上美瑛富良野的花園都去過幾次，揾來揾去，見到號稱日本最大級的太陽の丘えんがる公園有波斯菊花田，但要揸兩個幾鐘車，來回要五個鐘，心裡十五十六，但永遠支持我的駕駛員二話不說，叫我唔好想太多，想做就去做。結果雖然除左早餐之外，午餐只得一杯雪糕，但可以去一個未去過的地方，都係開心事。入夜至去到airbnb木屋，因為無包餐，要出市區食，美瑛的晚上非常靜，好多店都無開，好彩友善的屋主一早為我地訂左餐廳，飯後回木屋休息了。

跟住秘湯協會張名單揀温泉旅館，見到呢間好似唔錯，就揀咗。以為呢類傳統溫泉旅館房間或兩餐都會好standard，點知有驚喜，洋式房間簡單但舒服，fusion晚餐菜式有驚喜，溫泉連駕駛員都讚，大家咪以為佢咁講究，原來只係讚佢水溫唔太熱😒酒店近旭岳火山，可以順路去埋。

今日開始自駕，因為王子梳洗需時，所以小的自已去食早餐先。食完早餐番酒店，王子已梳洗完畢，可以出門口。喺附近行多陣就攞車。因為實在太耐無自駕，有點手忙腳亂，我最重視的藍牙居然駁唔到，最後帶住忐忑的心開車。今日只得一個景點，就係晚上下塌的温泉酒店，因為車程長又hea行公路的PA/SA，結果預先諗好的地方都無去，直達旅館。

海膽專門店，總店喺函館朝市。餐廳除左海膽飯仲有其他菜式，天婦羅、魚生飯都有，喺商業區地下街，我十一點幾到都要排隊。點左個大海膽飯，滿滿的海膽好似雪糕一樣軟綿綿，同之前一碗差天共地。

天氣報告好準，今日真係落雨，一早plan左shopping，所以影響唔大。天氣報告好準，一早就落大雨，著左水鞋著埋gore-tex，影響不大，想起一句芬蘭諺語：「無不適合的天氣，只有不適合的衣着」。先去二条市場食海膽飯，結果食到火起，立即轉塲食多碗至可以平復心情，隊友當然唔陪我癲，佢自己四圍行，原來幫我物色飯後咖啡店，真係多謝晒。之後行街，因為最後一日喺城市，所以要買的今日要買哂…….不過結果我買最多的都係Daiso雜貨😆😆晚餐喺酒店後面的串燒店，兩個人合埋眼點飲埋酒食到飽都唔使三舊，好滾動。yen 價低，真係使得好順心。

瞓飽起身，睇到天氣報告話明日會落雨，今日去左市內遊先。飲杯咖啡食碗烏冬醫飽肚，買張市電一日卷，上車開始一日旅程，一直都想喺旅行時買個one day pass，上架車漫無目的地，見到邊度啱就落車，上上落落睇下個城市，今次終於做到。經環狀線去左中島公園，藻岩山山頂。原本想去的圖書館無開，行下食下，一日好快就過去，真寫意。

之前經過呢間開喺後巷的意大利餐廳，感覺良好，擇日來試，餐廳走casual路線，幾款食物都唔錯，不過餐廳半開放，夏天來應該幾熱😅