Foodie 生活雜誌

房間 ： 備前2

今日主要遊鳥取砂丘，今次係第二次來，砂丘有如喺海邊的沙漠，地貌好特別，所以想帶駕駛員來睇下。上次來的時候天陰陰，之後更落大雨，今次幸運地遇到晴天，景色好靚。離開砂丘後去參觀砂之博物館，沙雕展品手工精細，值得一看。玩左咁耐原來午餐都未食 ，求其揾左間cafe食完就去嘆温泉了。

房型 : Premium twin room (25 m2)

雖然日元低水，但而家日本的酒店好似愈來愈貴，呢類鄉下的連鎖商務酒店都要成千蚊晚😖

對的季節吃對的食物，蟹的季節來到境港，就係衝著松葉蟹而來了。境港水產批發中心只得一個貨倉大小，檔口唔多，唔算熱鬧，喺其中一檔揀左兩隻蟹就開餐。餐後去今次旅程的主要景點之一 : 足立美術館 。館內最著名的唔係藝術品，係庭園枯山水，庭園規模大，分四個庭園，雖然紅葉未至，但庭園的設計就如一件大的藝術品，充滿禪意。離開美術館去出雲大社，純粹為左同門口條大注連繩合照，叫做到此一遊。唔明點解時間過得好快，回程入到市區已天黑，跟G神揾到間好餐廳，食左全個旅程最滿意的一餐👍🏻

今次旅程係源於大灣航空的米子直航，我想去山陰境港嗰邊，揸車過去幾遠，有直航就慳好多時間了。今次坐大灣航空的經驗良好，航班時間啱我，機艙新淨，座位唔算窄，坐得舒適。四點幾到達米子後，攞得車嚟都五點，醫完肚去行無印，因為睇中兩樣產品平香港三份一，買左先。跟住去酒店check in，當然要整多餐串燒餐做宵夜啦😁

第二日都係繼續hea，經過之前一星期的safari，每日早起，舟居勞頓，真係幾攰，來到Zanzibar 就係食同瞓了。住宿喺海邊，出面就係一個長沙灘，行下曬下太陽又一日。喺天台飲緊啤酒，見到海邊好熱鬧，落去八下，原來漁夫捕魚歸來，海邊變成臨時市集，幾有趣。晚上去左酒店介紹的餐廳，一間喺小島上的餐廳，潮漲時要坐船仔過去，我以為自己去左東南亞。

終於完結7日safari之旅，最初計劃係完左safari就返香港，但我覺得咁遠飛到過來非洲，無理由咁快走，點都要揾多一個地方去，咁啱團友睇左youtuber Polly小姐的介紹，想去Zanzibar 睇海豚，咁我地半團人去Zanzibar ，半團人返香港了。作為一隻井底蛙，對非洲的印象係草原、獅子、大笨象及土人，從來無想過會有沙灘，仲要係水清沙幼的沙灘，簡直係跳出我的認知，真無知。喺Zanzibar 的五日四夜都係住沙灘旁的酒店，純渡假mode ，我覺得Safari 係被包裝後的非洲，所有接觸的人與事都經過過濾，全屬高級出品，到Zanzibar 係半包裝，雖然都係遊客區，但已令我接觸到少少當地人同比較地道的食物，係另類開眼界的體驗。

離開草原之前，見到豹哥昨晚食剩的餐點，隻角馬咁重，都唔知佢點拖上樹

日元低水，唔去日本硬係好似蝕左咁，見到有米子直航平機票，可以去足立美術館，決定起行。今次係自駕遊，去之前同團友講鄉下地方無嘢做。結果去左境港食蟹，行左足立美術館、出雲大社門口，爬左鳥取砂丘，浸左兩晚温泉，探左柯南同鬼太郎，去埋後樂園睇紅葉（睇唔到），居然唔夠時間用，連outlet都去唔到，老人家真係手腳慢😅

天未光就起身去坐熱氣球，我未坐過，感覺新鮮，聽講話平時坐熱氣球就咁升上去，無咩睇，幾悶下，我款會見到動物喺地上跑下，叫做生動點，可惜飛得唔算高又無乜動物，叫做飛過啦。反而降落後的原野早餐幾有貴族感😀之後join番其他團友繼續safari。咁多日safari都未試過喺酒店午餐，今日決定唔好咁chur，喺酒店午餐及瞓晏覺，點知下午有大象家族來探訪，大鄉里的我當然又影一餐。黃昏再去一轉safari，居然執到個尾彩，連最難遇見的金錢豹都睇埋，非常完滿。之後喺河馬屋企旁邊開個祝酒會，正式結速7日6夜safari之旅了。今晚要執行李，明日去另一個截然不同的地方 : Zanzibar。

來到第6天，繼續Safari。一出門口已經見到獅子家庭開餐，近距離觀看，聽到獅子咬碎骨頭的聲音，比電視機睇到的真實得多。行兩行又見到一對獅子交配，睇足幾個round至走😝再行一陣又見到睇水的獅子兄弟，簡直就係獅子生態團。午餐後又收到風有crossing ，其實我睇左一次，又唔係一定要再睇，但領隊好有心，堅持要我哋等，我真係好敬佩佢哋對份工咁有熱誠，照理做左咁多年，睇左無數次crossing ，睇唔睇到對佢哋來應該係無乜所謂，我哋唔睇佢仲可以休息下，但領隊仍然好希望我地能夠睇到，係咁陪我哋等，最終睇到大家都好開心。

不過今次無上次咁好彩，等左幾個鐘，好彩我哋九個人，講下笑下又唔覺難捱。最搞笑係次次有人去緊廁所就會收到有crossing 的消息，如厠中的人就要裙拉褲甩咁趕快上車出發，因為動物唔等人，所以個個去廁所都好驚。又講下大家都會關注的問題 : safari 期間如何如厠？基本上午餐的地方都有厠所，其餘時間要就地解決。咪以為好戲劇性地㢌㢌下會有隻獅子大笨象企你隔離，其實領隊會揾個安全的地方，你去車尾解決就得。車上有紙袋，如厠後要將用過的紙巾放入紙袋內包好放番上車，結束一天旅程後會有人清理。