Foodie 生活雜誌

3/2016 光顧 39越南屋@油麻地

我去食越南菜最主要係食牛肉河同春卷，若果呢兩樣都唔得，就唔會再幫襯。呢間春卷足料，炸得剛剛好，上枱時都熱辣辣，生菜大大塊。牛河湯頭淡，以我的標準就唔係好得，好在食完唔太口喝。其他小菜都唔差，勝在價錢平，去開呢頭又想食越南菜都可以一試，餐廳茶記格局，坐得較迫。

3/2016光顧  

正店在西環，之前曾經想試，但去到門口聞到陣油益味就過門不入。見觀塘開分店，近近地加上雜誌寫得唔錯，去試下。結果都係唔太滿意。魚肉雖然滑，但好厚，似食炸魚扒，厚切薯條炸得乾身，不過始終覺得隻油好膩。意粉係最簡單的香辣蒜片意粉，廚師唔手軟，蒜片、辣椒同油都好多，唯獨意粉較少，所以夠香但油淋淋。呢度食物碟頭細，兩個人食完兩碟都唔飽，但質素普通，唔再追加食物，去第二度食就算。

3/2016光顧 T club@觀塘

睇雜誌介紹，以為又係普通咖啡店，揭過就算，點知見到句'coffee by Preigo，咁就要試下，因為我喜歡Preigo的咖啡。通常去鰂魚涌店(尖沙咀都有分店)，而家觀塘開左，唔使過海。餐廳設在辦公大樓內，一出𨋢靜英英唔見門口，以為自己去錯地方，想原𨋢落番去，要企定再check 清楚確定位置，原來轉個彎至睇到餐廳。室內設計清雅舒適，一列向海大窗。單位係多用途營運，有咖啡店、售賣健康食品、旅行社，另外又係教聯寫字樓。咖啡店咖啡水準如一的好味，食物我只試左個蜂蜜芥末烤雞沙律，雞扒健康無雞皮，烤得頗香，dressing 甜甜地，味道OK。不過價錢好似稍微比鰂魚涌貴？

(盤蠔個presentation 真係差，賣相似求其揾個面盆裝d冰，仲要座冰粒而唔係碎冰，down grade 哂。 呢盆全部係法蘭西蠔，三款，每款三隻，分別係mermaid, black pearl 同gillardeau。可能唔啱季節，全部都唔夠鮮甜肥美，好一般。)

(貴價意粉)

3/2016光顧

一套戲，就算幾大卡士，幾好氣氛，幾勁場面，劇本故事唔好都係死症。上集已經睇到炒蝦拆蟹，今集又係玩泥沙咁，全部高層為威喂，挫大dee咁話邊個做呀頭就做呀頭。高層個個神勇，若果警隊真係咁，真係準備定一打接班人都唔掂。故事有幾犯駁都無謂講，預左。但戲內各人都用力地演，個個面容繃緊，除左德彬同發哥叫鬆少少，其他人個個死老豆咁feel，莫非導演要求？唔知點解會攞多次影帝的郭先生將處長的冷靜沉著發揮得淋漓盡致，因為全套戲從頭到尾都係一個表情：無表情，睇到火起。我已經盡量以平常心睇，但睇到宇宙無敵爛的結局真係忍唔住笑住爆粗。睇呢套戲純粹為左陪朋友，若佢再要我陪佢睇第三集，我會絶交😡😡

(紅白sangria, 我喜歡清清地，選白)

3/2016光顧 

3/2016光顧 

此店放在我的待吃名單上已有好一段日子。初開業時勁多介紹，訂過幾次都客滿，又要限時，跟住就不了了知。結果四年後的呢日，擇日不如撞日，就咁walk in反而有位，不過之後都坐滿。店內陳設簡單，可以叫全無裝飾，只得一張圓枱，一張中枱加三張細枱，限時食90分鐘，生意難做，體諒。我只得兩個人，點左兩個海鮮，炒菜加炒飯，埋單四百多。小店成本高，所以食物唔係實惠價格，不過食物真材實料，店主每日揸車去流浮山買海鮮，煮工不俗，味道偏濃，店主一個人做哂，只得一個幫工一個樓面，所以人多的時候可能要等，限時90分鐘係有彈性。