Foodie 生活雜誌

(小店外貌)

小菜館一間，地膽介紹，隱世食店feel，裝修簡單，街坊格局，小菜配搭與煮法有心思，煮得有心機，唔係味精嘢，唔交行貨，味道OK 。個性小店，不定期休息，訂座電話：2895 3098

(雞腸麵 雞湯甜，雞腸夠粉，雞件新鮮，米粉索哂甜湯，正)

3/2016 光顧 

朋友成日坐車經過見到大大個牌，諗住食靚燒鵝，擇日不如撞日，就咁撞入去。話係飯店但係酒樓裝修格局，不過食物認真麻麻，黑醋木耳 醋味好怪，少少電油味;燒鵝已經係燒鵝脾，奈何肉靱皮唔脆，其他小菜炒飯油淋淋，浪費左一個quota

3/2016 Oslo cafe@九龍城

咖啡店一間，幾舒服，小食意粉味道一般，食完唔會記得味道果種。餐牌亮點係個甜品toast box，浮誇朋友點個最浮誇的macaron toast box，成個生日蛋糕咁捧過來，色彩繽紛，幾開心。不過我一向對太多人造色素的食物有保留，只係食左少少，又估唔到個迷理macaroon唔係太甜，一個適合影相多過食的甜品。

3/2016 光顧 39越南屋@油麻地

我去食越南菜最主要係食牛肉河同春卷，若果呢兩樣都唔得，就唔會再幫襯。呢間春卷足料，炸得剛剛好，上枱時都熱辣辣，生菜大大塊。牛河湯頭淡，以我的標準就唔係好得，好在食完唔太口喝。其他小菜都唔差，勝在價錢平，去開呢頭又想食越南菜都可以一試，餐廳茶記格局，坐得較迫。

3/2016光顧  

正店在西環，之前曾經想試，但去到門口聞到陣油益味就過門不入。見觀塘開分店，近近地加上雜誌寫得唔錯，去試下。結果都係唔太滿意。魚肉雖然滑，但好厚，似食炸魚扒，厚切薯條炸得乾身，不過始終覺得隻油好膩。意粉係最簡單的香辣蒜片意粉，廚師唔手軟，蒜片、辣椒同油都好多，唯獨意粉較少，所以夠香但油淋淋。呢度食物碟頭細，兩個人食完兩碟都唔飽，但質素普通，唔再追加食物，去第二度食就算。

3/2016光顧 T club@觀塘

睇雜誌介紹，以為又係普通咖啡店，揭過就算，點知見到句'coffee by Preigo，咁就要試下，因為我喜歡Preigo的咖啡。通常去鰂魚涌店(尖沙咀都有分店)，而家觀塘開左，唔使過海。餐廳設在辦公大樓內，一出𨋢靜英英唔見門口，以為自己去錯地方，想原𨋢落番去，要企定再check 清楚確定位置，原來轉個彎至睇到餐廳。室內設計清雅舒適，一列向海大窗。單位係多用途營運，有咖啡店、售賣健康食品、旅行社，另外又係教聯寫字樓。咖啡店咖啡水準如一的好味，食物我只試左個蜂蜜芥末烤雞沙律，雞扒健康無雞皮，烤得頗香，dressing 甜甜地，味道OK。不過價錢好似稍微比鰂魚涌貴？

(盤蠔個presentation 真係差，賣相似求其揾個面盆裝d冰，仲要座冰粒而唔係碎冰，down grade 哂。 呢盆全部係法蘭西蠔，三款，每款三隻，分別係mermaid, black pearl 同gillardeau。可能唔啱季節，全部都唔夠鮮甜肥美，好一般。)

(貴價意粉)

3/2016光顧

一套戲，就算幾大卡士，幾好氣氛，幾勁場面，劇本故事唔好都係死症。上集已經睇到炒蝦拆蟹，今集又係玩泥沙咁，全部高層為威喂，挫大dee咁話邊個做呀頭就做呀頭。高層個個神勇，若果警隊真係咁，真係準備定一打接班人都唔掂。故事有幾犯駁都無謂講，預左。但戲內各人都用力地演，個個面容繃緊，除左德彬同發哥叫鬆少少，其他人個個死老豆咁feel，莫非導演要求？唔知點解會攞多次影帝的郭先生將處長的冷靜沉著發揮得淋漓盡致，因為全套戲從頭到尾都係一個表情：無表情，睇到火起。我已經盡量以平常心睇，但睇到宇宙無敵爛的結局真係忍唔住笑住爆粗。睇呢套戲純粹為左陪朋友，若佢再要我陪佢睇第三集，我會絶交😡😡