Foodie 生活雜誌

3/2016光顧 

此店放在我的待吃名單上已有好一段日子。初開業時勁多介紹，訂過幾次都客滿，又要限時，跟住就不了了知。結果四年後的呢日，擇日不如撞日，就咁walk in反而有位，不過之後都坐滿。店內陳設簡單，可以叫全無裝飾，只得一張圓枱，一張中枱加三張細枱，限時食90分鐘，生意難做，體諒。我只得兩個人，點左兩個海鮮，炒菜加炒飯，埋單四百多。小店成本高，所以食物唔係實惠價格，不過食物真材實料，店主每日揸車去流浮山買海鮮，煮工不俗，味道偏濃，店主一個人做哂，只得一個幫工一個樓面，所以人多的時候可能要等，限時90分鐘係有彈性。

題外話 : 每次去呢d小鋪食完後都帶住無奈的心情離開，同樓面傾偈，佢呻鋪租貴，請人難，店主得一個人做，鐵打都唔掂。呢個係香港所有小鋪的困境。就算生意好，一雙手做得幾多？只有眼白白讓生意流走，ok，當你睇得開，盡做就算，但業主見你做得好，加租同你分身家，有咩辦法唔死。喺呢度無意討論什麼政策什麼經濟，純粹有感而發，呻完就算。大家自求多福，有得食就食啦。

招牌炒蜆  好大隻，都幾甜，但勁濃的辣椒加蒜蓉完全蓋過鮮味

清酒煮鮑魚  鮑魚煮得軟硬適中，用個清酒蠔油茨汁煨，茨汁頗厚，加點乾瑤柱，帶點貴氣feel

腐乳油麥菜  味道剛好，唔太咸

盧爸爸炒飯 即係瑤柱松子蛋白炒飯。炒得幾乾身，松子香，炒飯來講都叫清淡，起碼配左以上幾味濃味菜都唔覺太over

小鋪佈置簡單，每日都有不同是日精選。我見隔離枱碟雞都好大碟，我差不多食完至蒸好，大家來食真係要有點耐性。