9/2017光顧
新開業,食友強力推介,因為佢幫襯左日本師傅Adachi san 幾年,但之前師傅在竹壽司,我興趣不大,而家師傅過檔新店,點都要一試。新店由兩位日本師傅坐陣,細節做到足,醬汁同刺身的處理都好有心思,食器亦一絲不苟,點左$680十二件壽司套餐,有前菜、蒸蛋、麵豉湯、咖啡甜品,價錢稍貴。十二件壽司我一向都唔夠飽,師傅話下次可以提佢整大舊少少。可能係VVIP介紹加上見我食唔飽個樣,私人醒多一件比我,真係日行一善。 喺我幫襯當日午餐時間連埋我只得三人,八卦問下餐廳點解未做宣傳,負責人話剛剛開業,要run順左先做宣傳,唔想得失客人,態度正確,讚!
餐廳在安蘭街的食厦內
室內一列大窗,採光度好好
一邊吧枱,一邊個室
汁煮安康魚肝 食落個汁味道特別又幾好味,師傅話係用濃味豉油加紅酒煮,用來去腥味,食得出的心機。
蒸蛋 入面粒白果係綠色,大鄉里未見過,又問,原來綠色白果係熟d,味濃d,咪又話我日本C都香d,真係無平時食到的臭味
薑切得好薄
食材遂道遂道整理,即使將會立即做壽司,但都先放在木板上,好企理
魷魚、甜蝦、右口魚、燒金目鯛
拖羅、海螺、池魚
小肌魚用昆布醃過,唔好意思,我味蕾遲鈍,食唔出分別,不過感覺良好
海膽 鮮甜係基本
海鰻分兩個食法,一半係柚子鹽,一半落鰻魚汁 赤身
赤身
吞拿魚腩手卷 吞拿魚腩加入左醃蘿蔔,肥美之餘有口感,再夾大葉包紫菜,同名店TOKAMI的一樣美味
三文魚子
蛋壽司 真係要讚,蛋味濃之餘又有如海綿一樣軟,好出色
甜品係豆腐雪糕,另外有咖啡
全站熱搜
留言列表