Foodie 生活雜誌

10/2017光顧 

香港的壽司刺身店多如繁星，有次日本師傅同我講全世界最多鮨店的地方係銀座，其次就係香港，真誇張。質素好的日本菜價錢唔平，所以我幫襯每一間之前都做好哂research ，儲定錢至去。但上等人就唔同，我認真對待的一餐就係佢隨隨便便食個lunch 的地方。話說午餐時間，朋友經過見到啱食就入去，大拿拿三舊幾水個午餐，當茶記咁入去，真係我夢寐以求的生活方式。中價日本餐廳，天后小區都係區內客多，唔扮勁叫鮨乜鮨物，直接叫壽司店，感覺貼地，我亦唔會有太高期望，正所謂無期望就無失望，估唔到水準又ok喎，刺身新鮮，熟食水準都唔錯，可以一試。

套餐包前菜，刺身 (刺身套餐前菜無刺身)

南瓜沙律，滑豆腐，刺身係左口，金目鯛同帶子，睇落色澤麻麻但食落又可以

蒸蛋

特上刺身套餐 一碟雜錦刺身，赤睦、拖羅、牡丹蝦、海膽、時令秋刀都有齊，絕不欺場，刺身新鮮，物有所值，另配一碗白飯

和牛壽喜燒 燒汁甜度剛剛好，牛肉好滑，有多款蔬菜，豆腐，菇菌、粉絲樣樣齊，好足料，再加埋隻温泉蛋，好滿足

銀雪魚西京燒御膳 銀雪魚肥美嫩滑，甜麵豉夠香又入味，另一個不俗的選擇

套餐包甜品或咖啡

地方細細，裝修簡單清雅，吧枱約十個座位加個室兩張四人枱。