Foodie 生活雜誌

去得多黑門市場，又去下離黑門市場不遠的木津缷売市場。木津缷売市場係當地人的食品批發市場，不過其實都有好多遊客來購物了。市場外有好多食店，後面有一條木津橫丁，類似屋台，有小酒吧及小食店，晚上應該幾熱鬧。另外有一間業務超市，賣的都係大裝食品，供餐廳用，若你需要一次過買100包綠茶，2L豉油之類的貨品就可以喺度購買，否則小裝貨價錢唔覺特別平。反而市場內的乾貨市場及生菓檔較吸引我。

餐廳在街角，若唔係住附近，根本唔會來。

近年去日本，每個旅程都盡量安排一頓西餐。因為日本有良好的食材，加上日本廚師的心思及細緻度，創作出來的菜色每每為我帶來驚喜。為怕晚餐太拘謹及太貴，主攻午餐。今次選擇位於中之島的意大利餐廳，之前從未來過中之島，感覺似中環的金融中心地段。餐廳在商厦地鋪，門面簡單古典，內裡一室明亮，氣氛高貴中帶點casual，作為粗人的我都覺得自在。午餐7000yen 一個set，主菜有鴨,牛同羊選擇，不過同一枱的客人只能點同款主菜，解釋話因爲廚師要控制出菜速度。餐具精緻，菜色味道複雜但美味，配搭有新意，一個不俗的用餐經驗。

晚餐想食燒肉，跟日本開飯網去到位於心齋橋的餐廳門口，覺得唔啱feel，叫朋友們比多次機會我，決定轉入小巷碰運氣，見到呢間餐廳細細間，只提供A5級的山形牛，感覺良好，入店碰運氣。一對情侶好好人的讓出張四人枱，另一位識國語的台灣客人為我點菜。小店由一對老夫婦經營，我聽到台灣客人稱呼二人papa mama，感覺似家庭小店。客人話已光顧二十年，食完後覺得平靚正，不俗的選擇。

奇跡之星植物館係淡路島project 的其中一部分，但我只當係配菜，不過一場去到，又順便睇埋。點知原來又唔錯，温室內有好多不同種類的植物，分不同主題展示 : 日式庭園、家居佈置、rainforest ，而中央有主題佈置，今次係聖誕節，佈置得好靚，仲有cafe同精品店，係一個好豐富的植物館。

(淡路舞台草圖)

瀏覽網頁時被呢間對海的温泉酒店吸引，温泉酒店對於我就如景點，點知入住後真係覺得係一個景點  : 一個温泉樂園。訂的時候唔知情，話説温泉鄉的酒店通常開滿一條街，誰知今次入住的係同一集團旗下相連的五間酒店其中一間，温泉設施通用，即係住一間酒店就可以享用5間酒店的温泉！每一間酒店內的温泉又有多款温泉，加埋自己房內的風呂，真係要多幾個body 至浸得哂。但最其怪係温泉浸完後有一陣漂白水味，浸的時候唔覺，但浸完就似去完泳池游水一樣，大打折扣，呢個經驗真係從未試過，但第二日又無事，究竟係咩問題？酒店房間寬大舒適，遺憾係雖然訂非吸煙房，但其中一間房入住時仍然有煙味，要經職員整理後才能入住，早晚餐水準一般。

(所謂的絕景就係鳴門大橋景。日本好多地方都被形容為絕景，其實日文的絶景係咪即係美景？因為好多所謂絕景對於我來講都只係美景，可能我太認真，經多次失望以後，已經自行將絕景改為美景)

淡路島係今次旅程重點，出發前睇雜誌見到呢個景點，被海膽餐吸引，所以離開琴平後就直接來餐廳再食飯。因為會經鳴門大橋，所以旅客通常會睇埋鳴門漩渦再來，不過漩渦我已睇過，加上天氣麻麻，所以直接去記念館。記念館標榜有絶景睇，有餐廳、土產店，仲有鳴門漩渦科學館。其實記念館就似公路上的SA站，餐廳食物不俗，可以一試。

早餐後出發往淡路島，取道瀨户大橋經四國去，由於我已經去過四國兩衣，但琴平我未去過，去琴平最少有三件事要做 ： 遊金刀比羅宮、學做烏冬、食碗烏冬，但我無興趣爬咁高去金都比羅宮，整烏冬已經試過，所以只係食碗烏冬就算，真係到此一遊，叫做去多一個地方。

(餐廳在民居，外表平實，開外有個大魚缸)

成日有人問我點解咁鐘意去日本，其中一個原因係喜愛日本的四季分明，春櫻夏綠秋楓冬雪，就算同一個景色，一年四季都有不同景緻，真係百去不厭。倉敷美觀地圖之前來過兩次，但每次都行色匆匆，只停留兩小時，無法走透透，今次決定留一日時間行到夠。可惜都係唔夠時間行埋大原美術館，莫非要來第四次？ 一場來到岡山，去埋日本三大庭園之一的後樂園，可惜時間尷尬，秋去冬未來，紅葉枯了初雪未下，整個庭園失色不少。加上到來的時間已接近閉園，天色昏暗，景色大打折扣，就當到此一遊，有機會再來。之後去岡山市的 AEON MALL，商店極多，比outlet 更好逛，女士的另一個樂園。

吹屋故鄉村，屬於國家的重要傳統建築群保存地區，鄉村以往盛產鮮紅色顏料——弁柄（氧化鐵紅），所以村內有一條由紅色建築物組成的街道。某些老屋仍然保留舊有狀態，成為博物館供遊人參觀，有些老屋則改為商店、餐廳或工作室。可能景點交通不便，我地週六來到都不太熱鬧，鄉村只有一條街，附近景點不多，用兩小時已經可以行完，不過我食完午餐慢慢行，之後再飲下午茶，所以只係行一條街已經用左一個下午。

早上喺旅館食完早餐就出發去蒜山高原飲鮮奶。日本的鮮奶香濃鮮甜，直接去製品工場飲應該會更新鮮？蒜山高原有好多遊樂景點，包括一個有過山車的大型遊樂園 ，若天氣好又有時間，不妨開車來兜一圈看看。

三朝温泉的旅館選擇唔多，揀來揀去，結果只有呢間較合心意。一向喜歡住中小型旅館的我，好耐無住過大旅館，結果感覺都唔錯。房間舒適，温泉設計有心思，晚餐的蟹宴我尤其欣賞。雖然係大型酒店，但住客好安靜，浸温泉時亦唔覺好多人。不過服務始終無中小型旅館咁貼心。

三朝温泉，島取県其中一個著名的温泉區，位處倉吉山區，跟之前熱鬧的城崎温泉好唔同，三朝温泉純樸清靜，到訪當日並非假日，天寒下雨，好多店鋪都關門，更顯冷清。我地沿住河岸兩邊行一圈，就回酒店了。

2017山陰山陽大阪遊 遊記篇 Day 4 (餐廳 : 大江ノ郷自然牧場　ココガーデン ）

每次去日本總係要食pancake (其實唔只pancake😅)，因為個空氣感同蛋香喺香港絕對食唔到。今次去的地方較為鄉下，又估唔到喺山巒間的鄉郊牧場會係兩幢現代化的建築物，而建築物內會提供咁多美味食物。牧場以出產雞蛋「天美卵」為主，而餐廳食店就提供由天美卵製成的食品。喺開陽舒適的環境食個下午茶，感覺非常悠然。另一楝大樓內的美食亦都吸引，可惜胃納唔夠，已經食唔落。

一大清早出發去賀路港鮮魚市場食早餐，今日天氣麻麻，落雨又大風。印象中的魚市場係好熱鬧好多嘢食，點知到達目的地時只覺空曠又冷清清，得幾間小商店賣海產貨品，裝修簡單，食店又未營業，有點失望，原來我停錯地點，去左對面的浜下水產店。著名的海鮮市場係對面一排紅磚屋內，市場9點開始營業，同日本好多海鮮市場一樣，客人可以即時於場內海鮮店選海鮮，再交由店家即塲烹調，蟹季當然最多人食蟹，不過我夜晚食蟹餐，所以放過佢。最後去場內食店賀露丸食幾碗海鮮丼就算。

酒店外貌，比較大型（圖片摘自網上）

鳥取只留一晚，酒店選擇不多，好多都係房間面積較細，揀來揀去只得呢間。傳統大酒店格局，但好明顯有點歷史，大堂房間有點舊。地點方便，對正車站，步行至商店街只需五分鐘。

(餐廳在喑黑小街上，門口堆滿放住海鮮的發泡膠箱。鳥取唔係大城市，店舖好早關，晚上7點多街上已冷清清)