Foodie 生活雜誌

3/2017 光顧

好旺的一間餐廳，朝早10點幾去到都已經好多人，大部分為外籍人士，室內鄉村風佈置，氣氛悠閒，似去左外國。室外對住條電車路，我就唔喜歡，不過大把人欣賞，都係坐滿。食材新鮮，擺碟靚，味道唔錯，不過侍應招呼麻麻，一臉不耐煩，而且出菜慢，間中漏單，見鄰桌幾個都係咁追單。記住要有時間先好來hea。

3/2017光顧

一直諗住餐廳係綽頭嘢，係粉絲至會去，所以從無幫襯。今次住附近的朋友話出品唔錯，就一齊去開餐。 裝修雅緻，服務好好，走高檔小館路線，燒味好味，其他菜式普通，食完會口渴。餐廳不停播住麟及李的金曲，又真係幾好聽。

(餐廳在民居巷內，地方企理)

​

​

唔知點解一直比我感覺係銀河GALAXY 較低檔，GALAXY入面5間酒店其中4間 (Banyan Tree、JW Marriott 、Ritz Calton、大倉)，間間名牌，GALAXY一拍埋去，即時矮左截，正所謂「店比店，比死店」。點知入住過後至明白原來係自己狗眼看店低，住完又覺得唔錯。房間面積普通，燈光冷氣適中，衛浴夠大，缺點係露台門唔開得。今次我地一行十一人，有大有細，朋友兩家book左connect room，小朋友走來走去，不亦樂乎。加上附設的天浪陶園，大人細路都啱玩，我地幾個熟齡老友更加尋回點點當年海浪公園水上樂園的感覺，好開心！細路可以去付費兒童樂園，酒店行過對面就係官也街，真係一站式購物玩樂，船程短，娛樂設施大眾化，難怪價錢貴一貴都咁吸引一家大細過來玩。

(下雨天，好襯黑白色的門面)

感謝團友的成全，落住大雨都肯特登坐的士來同我食個早餐，真係人生有個真正旅伴的確好極！餐廳的pancake 唔係賣空氣感，不過都係軟綿綿，而且係呢個旅程中三間pancake 店中最有蛋味的。雖然係好出名，不過就唔係我的心水，我都係喜歡疏乎里feel。又或者係同一問題 : 早餐時段食唔到招牌的pancake?

喜歡關西風的天婦羅，來到京都無論如何要一試。可惜首選的京星裝修中，不過百老店八坂圓堂都出名，講真，我都係慕名而去，以我的level，應該都分唔出兩間名店的分別。一早已經在網上訂定位，收到確認電郵時寫到明遲到一分鐘都會被取消訂位。其實就算唔寫我都一定唔會遲到，不過寫到咁又真係感覺唔良好，而家去日本訂位就係會受到呢種對待，有時都覺得自己犯賤 。被安排於老房子內的廂房用餐，好有風味，由年輕師傅主理，一次招待三組客人，食物炸漿薄，材料新鮮，不過可能師傅尚欠經驗，天婦羅帶點油膩，尤其係最後的茶漬飯，不太突出的一餐，讚賞女侍們服務態度好好。

京都最熱鬧的地方應該集中喺京都站，三条四条一帶，比較起來，二条就悠閒得多，滿街型格小店。記得曾經特意來一保堂買茶，之後就離開。原來附近好好逛，可惜今次又係唔夠時間，下次，下次一定要來好好的逛個飽！

(門口種滿植物，帶點熱帶雨林氣息)

舞鶴，只睇名字已經覺得好靚，心中即時想起飛舞的仙鶴，好有仙氣。事實卻剛好相反，舞鶴係一個軍港，主要發展工業，充滿剛陽氣。我對軍事歴史等題目無興趣，來參觀只因紫陽花，今次旅行踏正紫陽花期，舞鶴自然文化園係京都區內最多紫陽花的景點，十萬株紫陽花開滿整個山谷，身處其中，頗有置身童話國的感覺。