Foodie 生活雜誌

2/2017 光顧 旭@銅鑼灣

繼續食材新鮮，水準穩定。不過花款唔多，所以每季去一次會好d，去得多都幾悶。店內另在鐵板燒，都好多人食，其實可以兩邊點菜，揾次試下鐵板燒先。

2/2017光顧

保安道街市熟食市場內的檔口，要襯天涼去，夏天太熱，一定頂唔住。檔口開在一角，晚上幾靜，相反另一角的火鍋店就人氣沸騰。檔口提供一般泰國菜的餐單，價錢實惠。點左海南雞飯，馬拉盞炒通菜及咸魚炒飯，整體來講味道較淡，但對於我就剛剛好。不過後來食開的朋友話佢為左遷就港人先淡口d，其實落單時可以要求原味。呢度的海南雞飯較特別，因為碟飯好熱！

2/2017光顧

睇個名就知夠禪。為左呢間餐廳，我真係三顧草蘆 : 第一次放假，等二次無開，第三次來至成功。餐廳以品茶，賣茶為主，格調清雅，播住柔和音樂，靜靜的嘆茶用餐，的確寫意，食物又好味。餐廳逢星期三休息，間中又有包場或工作坊，去之前記得先打電話查詢。

2/2017 光顧

之前寫過，好喜歡呢度的氣氛，咖啡都唔錯，今次點左個all day breakfast，其實我好少食，總覺得係凍肉大雜會，好呃錢，不過對間cafe有偏愛就點左。嚟到見到好的式，不禁又呻笨，但食落就知係心機嘢，用料都唔錯，薯仔搽左蜜糖焗，腸仔好味，水牛芝士蕃茄加黑醋，雞蛋烟肉唔會乾爭爭，唯一缺點係貴。所以點都坐番佢兩粒鐘，睇哂d雜誌，感覺良好d。知佢最近續左三年租約，即係做得住，恭喜。

1/2017光顧 昌發泰國粉麵屋@九龍城

新精頭想簡簡單單，唔想食中菜，不如食泰菜。點碗鴨肉湯河，等左九年都未嚟，對家碟飯都食完，諗住應該係精心製作，無死（智障式思維）點知來到湯淡鴨肉鞋，反高潮，反而朋友的咸魚炒飯好香口，幾好食。 九龍城咁多泰菜，又可以去少間了。

1/2017 光顧

荔枝角長沙灣開左不少西餐廳，原本想去的無開，想起朋友提過呢間餐廳，就在附近又來試下。餐廳裝修係時興的工業風，放在開滿回收店同舊鋪的內街都頗突出。午餐唔洗一百，有餐湯意粉咖啡，唔算貴。食物大有進步空間，咖啡可以，但唔洗特別來。

2/2017光顧 新三得火鍋海鮮酒家@九龍城

食飯前幾日分別聽到兩班朋友都喺度食，心想係咪真係咁好食？食過後知道原來真係唔錯。我地人多，坐樓上房間，唔太迫夾，點左好多食物，全部食材料靚新鮮，食得暢快，價錢就當然唔平，不過家下打個邊爐都要幾舊水落樓，又係果句，覺得值就算。

1/2017光顧

我睇網評話唔錯，去到至知原來電視介紹過，好似幾出名，都好多人幫襯。位置在佐敦偉晴街，順德公隔離，僻少少，一般小菜館格局，較嘈吵。菜色選擇唔太多，又係菜式改個靚名收貴d的小菜館，例加韮王蝦仁炒黃埔蛋，我見識少，唔知咩係黃埔蛋，所以點來試下，原來係普通蝦仁炒蛋，即係隻蛋喺黃埔嚟？真係唔識。食物份量少，較油膩，唔多對我胃口，試過就算。

1/2017光顧 

朋友想揾間坐得舒服的西餐廳，唔想冒險試菜，呢間之前食過，印象唔錯，又再來。餐廳唔太大，好喜歡其室內設計，清雅高級。餐牌同上次差不多，點左兩個daily special，結論同上次一樣，pasta好食，main course 普通。

1/2017光顧

今晚在坐四個人，其中分別有兩人的朋友試過都話好食，諗住無死錯，結果希望愈大，失望愈大。餐廳位於荔枝角工廠大厦內，離地鐵站有一段距離，但晚餐4個course都要接近四舊，不過都開始習慣呢區的高價位。可惜質素跟唔上價錢，廚師應該好努力想創新，做高級嘢，但似乎唔多成功，起碼今晚在坐的四人都唔buy，擺碟無美感，只係畫彩色糖醬落隻白色碟，問左有無轉過廚師，答案係無，可能今晚做廚的心情唔好？定係我無食神？餐廳由地鐵站行去G神話要七分鐘，近山邊，轉彎又轉彎，區外人真係要靠G神。