Foodie 生活雜誌

1/2017光顧

今晚在坐四個人，其中分別有兩人的朋友試過都話好食，諗住無死錯，結果希望愈大，失望愈大。餐廳位於荔枝角工廠大厦內，離地鐵站有一段距離，但晚餐4個course都要接近四舊，不過都開始習慣呢區的高價位。可惜質素跟唔上價錢，廚師應該好努力想創新，做高級嘢，但似乎唔多成功，起碼今晚在坐的四人都唔buy，擺碟無美感，只係畫彩色糖醬落隻白色碟，問左有無轉過廚師，答案係無，可能今晚做廚的心情唔好？定係我無食神？餐廳由地鐵站行去G神話要七分鐘，近山邊，轉彎又轉彎，區外人真係要靠G神。

1/2017光顧

連續兩晚在荔枝角晚餐，兩晚都係中價西餐，雖然價錢相差三份一，但質素差得遠。貴d呢間開左幾年，剛開業時荔枝角並未好似今日咁興旺，路過見到個水晶燈裝飾格局，價錢又唔平，心諗都唔荒做得耐，點知餐廳直到今時今日仍健在，應該有d料到，又試下。菜式設計平實得來有諗過，煮功扎實唔花巧，用料質素好，味道唔錯，起碼同價錢成正比。若住在區內想食餐似樣的西餐，又唔想出外，呢度係一個選擇。

1/2017 光顧 Cafe Sausalito@深水埗

某日行過大南街，見到呢間有型cafe，在舊區中頗突出。幾個型仔年輕人經營，入到去居然同我講英文！(好彩唔係普通話) 深水埗咋喎大哥，訪問之下，型仔話我知原來深水埗已經成為左世界各地backpacker 喺香港的旅遊重點，間cafe好多外國客。小小cafe 佈置隨意中有心思位，食物簡單但用料質素唔錯，咖啡香濃，經過附近不妨試下。

(鴨肉河得個咸字，雖然唔係死咸，但無左平日鴨肉湯河陣藥材味，咁有齊蘿蔔鴨紅芽菜，總叫合格。)

1/2017光顧

好少食川菜，因為唔係好辣得，不過朋友生日，梗係捨命陪君子。餐廳以套餐形式點菜，每位$320， 在小菜紙上選涼菜同熱菜，碟數多少以人數決定，愈多人可點愈多，我地三個人，點左兩個涼菜四個熱菜。菜式以香麻辣為主，碟碟紅彤彤，辣得過癮，我最欣賞係味道辣得來都仲食到食物的原味，唔會全部一個味。餐廳地方細細，建議預先訂位，只收現金。

12/2016光顧

$46一個菜肉雲吞豬大腸刀削麵加豆漿套餐，唔算貴。菜肉雲吞一早煮定就梗㗎啦，但食之前可唔可以淥下佢，唔好就咁放落去？因為入口仲係涼的。滷水豬大腸夠入味，good。刀削麵有咬口，湯底係一般豉油湯底，唔太口渴，一間普通但唔會伏的麵店。

入去餐廳之前都知道係簡單食物，有益organic之類，但當我見到上枱時只係將個番茄同個牛油果切片後再鋪上塊麵包時，我真係有點納悶。堅係認為自己呢個智障廚房都識整，有時去得餐廳，點都希望食d屋企未必會整的食物，未必一定好複雜，但都應該用腦諗下，例如切下蕃茄碎或做下牛油果醬，可能我就係唔適合咁基本的餐廳吧。

12/2016光顧

好心地集團的新開的高檔food court，開在中產屋苑太古城內，唔荒無生意。food court 內有不同檔口 : 三文治、high class 茶記、pasta、飯團店，另有兩間餐廳 分別提供飲茶同東南亞菜，地方寬敞舒服，我被雜誌介紹的原個芝士松露炒意粉同炸雞蛋飯團吸引來到，食完結論係唔洗特登來

12/2016光顧

一間我會回頭的咖啡店，咖啡香濃幼滑，食物質素好，簡單但製作認真，呢度又似咖啡實驗室，時時有期間限定不同配搭的咖啡特飲，次次去都有新鮮感（有部分原因係我幾個月至去一次）好似今次的聖誕限定pancake，又靚又好食，加杯咖啡特飲，好開心。