Foodie 生活雜誌

2/2016 光顧

特別到此日式洋食店食egg benedict班尼迪，日式班尼迪同傳統西方的有咩分別？就係一貫日式做法 ： 保留外型但骨子裡完全注入日本元素，改變後又唔覺突兀。呢個變種班尼迪都唔錯，唔好同傳統的比較，當一個新的菜式就好了。

新開業時見雜誌好多廣告，咁啱朋友提議來。鋪頭分兩層，一行8人被安排坐閣樓，地方簡單但清潔整齊。同枱幾位德高望重人士唔食辣(早響就唔食泰國菜）唯有點唔辣的，可能因為咁而食物大打折扣，食物味道較淡，到喉唔到肺咁

2/2016光顧

喜歡四圍貢，經過書局街見旁邊有條街仔就走入去，原來沿住樓梯都係食店，後來至知條街叫錦屏街。中餐西餐都有，但數人氣最旺的就係最頂呢間青藏牛肉麵。鋪面唔細但客似雲來，一路食都不停有翻枱，爆哂塲，仲有人等外賣。有麵食、串燒、小食等多款選擇，價錢公道，食得過，只係稍嫌味道相對較淡，呢類外省菜通常重口味嘛。

登山係高危活動，能登上珠峰係登山者的夢想，但每年總有人遇害，能夠登頂的，三分實力七分運氣，頂級高手都要聽天由命。本片故事簡單，一班熱愛登山的隊友橫跨十年的經歷，大家一起打拼登過多個險峰，生死與共。其中一對亦師亦友的好拍檔多次結伴攻頂，可惜一次意外，兩名徒弟帶隊時命喪山上，登山隊亦因此解散，隊員各散東西。一年後，登山隊長決定上山帶回徒弟屍體回家.......故事無特別，但拍得真摯感人，前半段輕鬆惹笑，後半段感人催淚。有關登山的戲睇得多，大多係荷里活製作，最有印象的已經係多年前的vertical limit，今次韓國製作都拍得精彩，加上韓國人特有的慷慨激昂情緒，令氣氛更感人。結果我喊濕左張紙巾。

2/2016 光顧 壽司淳@灣仔

食之前，睇雜誌介紹得好精彩，食之後，睇另一本雜誌介紹都好精彩，只係我光顧的時候唔精彩。餐廳食材新鮮品質高，但問題喺師傅度。話說serve我的師傅見佢手震震咁，加上處理刺身的方法，我已經有離坐的衝動，可惜已落單。刺身新鮮，所有壽司已做調味，不過就唔多合我心水。最激氣係由另一位師傅serve的客人與我食同一個餐，居然部分食材同壽司處理方法係有分別！我作出反映，店員話呢d就係omakase 的分別，下次比番雙倍我，但我食的係套餐，成五舊水一個餐，價錢與水準不成正比之餘仲要用料有差別，絕對激氣。我唔好彩遇師傅不淑，浪費左我的時間與金錢，無左一餐仲要激鬼氣。若果你想去，一定要選出名的兩個師傅，但我都唔會再去，當日感覺太差

2/2016光顧 

拉麵同烏冬都係日本麵食，個人喜歡烏冬多d，在香港的烏冬店就比拉麵店低調得多。稻庭養助係我會回頭的烏冬店，烏冬用稻庭烏冬，滑得來有咬口，有水準。店子話就話以烏冬掛帥，實質係一間居酒屋，刺身、串燒、小食、鍋料理、天婦羅都有，選擇多，出品都唔錯。店子不經不覺已開業兩年，初幫襯時諗住鋪頭捱唔住，因為對比附近店鋪價位明顯較高，但又唔係開在黃埔花園內，最近幫襯至知再續約兩年，但店主都嘆租金高，經營難，希望小店能繼續下去。

2/2016光顧 

觀塘發展一日千里，非常多樓上鋪，食嘅買嘅玩嘅樣樣齊，幾乎每個月都有新店，今次的小菜館隱身在工厦中，裝修簡單，係「呀蟲介紹嚟feel」。晚餐係私房菜形式，每位計，有菜單提供，可以更改，當然價錢另議，今次我地係每位二百五十，三款小食加十一個菜，份量足，店鋪頗出名，某專欄作家讚到飛起，要一早訂定，可能我地點的菜比較普通，食物又唔覺得特別好食，除左幾味較特別，其他都幾乎無印象，試過就算。

2/2016光顧

德田邨樓下的小店。抵食夾大件，但食物就麻麻，睇d顏色就知。小店生意唔錯，街坊生意，簡單一餐飯，唔好要求太多。

2/2016光顧

有d餐廳你問我貴唔貴，我真係唔識答，反而問我值唔值就易講d。家下出街食飯，食好少少都要三舊水以上一個頭，若果係節日仲死得甘，就好似呢日，諗住求其揾間食，盲中中去到商場門口至知係情人節 （well，到左某個年紀，呢d節日就唔會記得)，好多餐廳full左，一係要最低消費，一係食套餐。見呢度可以散點，就入去，誰知揸fit 人都係點左個沐浴在愛河之中套餐，話抵食😱😱。再散點兩個菜，三大一細埋單一千，大時大節（對商場嚟講），唔算貴。但食物就如大快樂，只係放得靚d，環境好d。山長水遠中伏了。但我見食評唔差，可能我又唔好彩😩

2/2016 光顧 

開左N年，N年前都常去幫襯。但人就係貪新鮮，太多新店，太少時間，漸漸遺忘此店。最近朋友提起再去，相中食物都係食泰菜會食的，味道仍然重手，唔會遷就本地人，唔知咁係咪叫地道，總之就係N年無來都無走樣，味道唔錯囉。值得一提係個青檸牛肉，牛肉嫩滑，配酸酸的青檸汁加蔬菜，醒胃！侍應哥哥仔果然無介紹錯😍