壽司淳@灣仔－Foodie 生活雜誌

2/2016 光顧壽司淳@灣仔

食之前，睇雜誌介紹得好精彩，食之後，睇另一本雜誌介紹都好精彩，只係我光顧的時候唔精彩。餐廳食材新鮮品質高，但問題喺師傅度。話說serve我的師傅見佢手震震咁，加上處理刺身的方法，我已經有離坐的衝動，可惜已落單。刺身新鮮，所有壽司已做調味，不過就唔多合我心水。最激氣係由另一位師傅serve的客人與我食同一個餐，居然部分食材同壽司處理方法係有分別！我作出反映，店員話呢d就係omakase 的分別，下次比番雙倍我，但我食的係套餐，成五舊水一個餐，價錢與水準不成正比之餘仲要用料有差別，絕對激氣。我唔好彩遇師傅不淑，浪費左我的時間與金錢，無左一餐仲要激鬼氣。若果你想去，一定要選出名的兩個師傅，但我都唔會再去，當日感覺太差

用料新鮮，但每件刺身都喺毛巾度印完先，我已無胃口，個海膽同我火炙，話好少地方有得食，我當然明白，因為我都係第一次見，唔識欣賞，加上大細超，人地係燒拖羅手卷，我係醃蘿蔔手卷

套餐有齊前菜茶碗蒸同雪糕

一開始喺個lock and lock 盒度攞件左口魚邊出來已夠驚心動魄

最恐怖係燒完個魚邊用條毛巾吸油，我見識少，問個經理，佢介紹自己係營運總監，以前係君悅日本菜個廚，佢話好多高級壽司店都係用毛巾，志魂都係咁，我見識少，唔知道，又可能個師傅手勢唔利落，總之就接受唔到囉。見d師傅所有魚生切完都會先用毛巾印下佢，(我明白有d係需要，但都唔係每塊呀😫）睇到我倒了胃口，唯有叫佢處理我果d要用廚房紙。