Foodie 生活雜誌

4/2017 光顧

一早知道大户屋內有私房菜，由以前中環名店NAOZEN的料理長佐藤直行主理，終於有機會一試。晚餐serve會席料理套餐，每位計，食的係師傅心機同時令食材，想食刺身壽司的可能要失望。私房菜於大户屋店內的吧枱，只有7個位，除左因爲多人book，仲因爲佐藤師傅間中要去世界各地的大户屋視察，所以朋友一個月前已book定位。晚餐驚喜不斷，餐具精緻美麗，食材新鮮味道好，擺碟靚，份量足，師傅友善，侍應服務好，好滿意的一餐。

4/2017光顧 

裝修、餐具、擺碟、menu都靚靚的餐廳，唯獨對食物味道無印象。一般大集團餐廳，無咩好寫，睇下相啦。

3/2017 光顧

泰國菜食下食下好似間間味道差不多。今餐都係點例牌的串燒、柚子沙律之類，食物足料味道ok，普普通通但唔會伏。其中碟黃薑雞唔得，碎濕濕，反而海鮮冬蔭公湯放左隻蠔落去成為亮點。

sogo supermarket 一向好受歡迎，而家裝修完，呢期更hit，我當然要湊熱鬧。新裝修，夠光猛，地方闊落左dd，貨架唔高，減少壓迫感，行得比以前舒適，貨品以日本貨為主，我就覺得幾齊全，至於價錢我通常唔使睇，因為根本唔會買😜反而對超市內的熟食檔有興趣，「掃街」掃得好開心，搞到八達通都要增值。另外禮品部都引入左好多新牌子，熟悉的糖村，杉養蜂蜜等都有，仲有我最愛的山本海苔，以後去日本之前要來睇下先，唔使抬得咁辛苦。

同事Miss Funny去梁九記買左幾款蛋糕做散水餅，分別係lemond cheese cake, blueberry cheese cake ,日式芝士蛋糕同芒果千層蛋糕，款款都好味。其中我最喜歡芒果千層蛋糕，一層薄餅一層cream一層芒果，夾埋似食鮮芒果雪糕，另外日式芝士蛋糕都唔錯，勝在夠平。不過梁九記勁多人，又未必次次齊貨，所以好多謝Miss Funny咁有心，山長水遠一早入去大埔買完再番工，仲請左我食好多舊。Miss Funny，祝你有美好的前程，繼續你的funny mode。

3/2017光顧

總係認為一間餐廳最重要的係食物，就算裝修得幾靚，擺碟幾精緻，傳媒吹到點勁都好，食物唔得就係唔得。睇到呢度，大家應該估到我係伏左。因為要就時間睇戲，只能在附近揾食。見呢間北歐小清新格局，又記起有雜誌介紹過，諗住試下新嘢，結果伏左。完全符合公式 ：裝修靚、傳媒吹、雜誌式靚餐牌、比隻靚碟你。食物size 細到笑左出來，點兩個菜，一個咸一個無味，一間只賣包裝不賣實力的餐廳，居然仲開左幾間分店，我估應該係我味蕾有問題，我再檢討下。

3/2017 光顧

著名的華嫂冰室，聽講食個菠蘿包都要排個幾鐘，仲要在屏山，山長水遠，所以從無參予。咁啱觀塘開左分店，某日誤打誤撞去左佢在工廠大厦內的外賣部，完全無人，所以買左個包，覺得水準唔錯，的起心肝去觀塘分店食。食物出品真係唔錯，食材認真，整得有心機，係有質素的茶餐廳，但值唔值得要排成個鐘？我個人就甚有保留，分店當然都係排隊格，不過我一個人，加上唔係繁忙時間，通常15分鐘內有位，呢個係我可接受範圍。

3/2017 光顧

喜歡去食早餐，睇落價錢係幾貴，但食物質素高，果汁鮮榨、蛋料理好味、甜品靚靚、飲埋杯招牌茶，超級飽。環境舒適，早餐點餐時間由10:00至11:30，你可以坐到幾點都得，早餐時段仲有9折。我間中都會食，早上的商場人流唔多，就算係半開放的店都唔會嘈吵，想喺九龍區舒舒服服嘆個早餐，我會選呢間，通常10點坐至1點，除番佢個鋪租都抵。

3/2017光顧

好耐之前曾來過飲茶，印象唔錯，但之後每次想來都無位，呢日居然walk in 有位，不過都要坐隔離同集團的西餐廳坎公館，點心就點阿一的。點心用料好，黃沙豬潤腸又鮮又滑、鮑汁鴨腳夠稔夠入味、炒飯乾身，粒粒分明、燒賣足料漲爆、蛋白杏仁茶蛋白滑杏仁香，蟹肉魚翅灌湯餃高湯清甜但以價錢計份量太少。招呼好好，環境舒適，呢餐唔好問我幾錢，只能透露個灌湯餃係$148，好Q貴。

2/2017光顧

尖沙咀好多飲茶的地方，有興趣試的都試過，睇左好耐結果揀呢間。酒店內的餐廳環境一定唔差，但估唔到侍應們個個黑口黑面，忍唔住問其中一個係咪唔舒服，問完佢至變臉比番d笑容。我唔係要人賣笑，但都唔好黑面吖。明知係上海菜，唔會期望有太多粵式點心，食物同好多餐廳一樣咁的式，味道普通，長輩們唔多buy，直至見到碟炒麵至識笑，唔因爲好食，係因為夠大碟，笑死我🤣曾經來食晚飯唔錯，估唔到飲茶唔得，一定唔會再來。