Foodie 生活雜誌

5/2017 光顧 新蔡潤記 / 群記 @大埔

去到大埔梗係要食區內名物，經過群記又係排哂隊，立即轉個彎去蔡潤記。我唔知新舊有咩分別，只知$28一碗的牛肚魚旦河，魚旦似未長大，同牛肚一齊好凋零咁喺河粉上飄泊，朋友的牛腩河都係同一景況，未食見到都無癮，味道普通。

牛肚魚旦河@新蔡潤記

牛腩魚旦河@新蔡潤記

隔日又入大埔，可能係平日，群記門口終於無人排隊。本來想點爽腩，但只得淨食，$135，我估食完係會識飛，我想腳踏實地，所以同朋友各自點左牛腩同牛面豬 (好彩無點，相內有講)。牛腩普通，有點黐牙，反而牛面豬牛味好濃又多軟稔。重點係個湯底，清甜得來帶有濃濃的牛味，食完唔口渴，係我心目中的好湯底，讚！

牛腩河@群記

牛面豬河@群記

淨爽腩  話說我見到爽腩淨食要$135，見到個價，未理size都唔會點，食唔起。同枱一對情侶點左，淨爽腩一上枱，我地兩pair人雖然互不相識，但都忍唔住你眼望我眼O咀笑左，因為實在太細碗！我問可否影張相，對方女子仲好幽默地借支細可樂我拼埋影，話咁先影得出有幾細。好彩我無食，否則真係赤到上腦。最後男的都要點多碗麵，粗略估計佢呢餐要over 兩舊，食碗麵啫，好似過份左少少。