Foodie 生活雜誌

10/2021 光顧

喜歡東北菜，以前返國內小旅行一定會食。呢間餐廳有幾間分店，菜式多，味道唔錯，雖然枱細位迫，但價錢經濟，無乜要求。

食過兩次都ok，以後去荃灣又多一個選擇。

東北黑山羊煲 羊肉塊連皮，炆得入味，肉質柔軟，啖啖肉，配料有粗粉絲、冬菇及筍肥厚，仲有支竹馬蹄，好足料，湯汁香濃味道好，跟廣東羊腩煲唔同，無爐無生菜，細份$168，二人食剛剛好，要扣分係支竹炸得有點過火。

清炒萵筍 東北菜來講，唔算油膩了

口水雞 雞件有肉（好多餐廳的口水雞都好細件又多碎骨）醬汁濃厚香辣，配墊底的青瓜絲食仲好味

東北亂燉 餐牌上有幾款燉菜，上次見隔離枱點的雞肉燉菜幾吸引，今次都點番個。燉菜內有排骨，薯仔、茄子、粟米、青豆、紅蘿蔔等多款蔬菜，茄子薯仔都走左油，排骨肉軟，所有配料浸在濃稠剛好的湯內，就如一道家常菜，幾好味

京蔥羊肉餃 皮薄饀料脹卜卜，味道適中，$42 十隻，扺過自己煮

仲有片皮鴨，二百零蚊隻，可以點半隻，我見好受歡迎，好多枱都有點

荃灣店位置隱蔽，喺DONKI food court 出口旁邊轉入去。

開放式坐位，我好怕坐呢類餐廳，因為周圍好多人行過，一路食一路覺得自己似動物園內的動物咁比人望。不過餐廳位處商場角落，除左等位的人就無其他人經過，屬於私人動物園。

同商場內好多餐廳一樣，有露台位，望住大橋景都幾靚。（不過我影唔到）