Foodie 生活雜誌

2018冰島丹麥遊 遊記篇 Day 6 Dettifoss

hea完兩日，今日又開始投入旅行團般的行程，去熱門景點 ： 鑽石圈 ，先去Dettifoss。Dettifoss有兩個停車場，一個在觀景台附近，另一個在瀑布下游，兩個停車場正正在瀑布兩邊，我因為無概念，無特別set去邊個停車場，結果G神帶左我去下游的停車場。感謝上天，雖然仍然大風，但喺重要景點的日子比個大晴天我，令我睇到氣勢磅礴的大瀑布及雙彩虹，好有打牌四圈至開糊，運氣番哂嚟的感覺。太后靜左咁多日，今日來到大舞台，當然又表演危險動作啦！一路上叫人唔使扶唔使陪就梗㗎啦，但最嚇破胆係當我地在瀑布頂小心翼翼的行來行去揀位影相時，太后居然又話要影！我同駕駛員只好硬著頭皮，好似太監一樣誠惶誠恐地扶住太后，影完立即勒令佢行番埋去，不得停留，因為一不小心失平衡就會跌落呢個出名水量勁，落差高的大瀑布，到時真係渣都無，嚇Q死我。所以同太后去旅行真係要食定驚風散。

在家早餐，呢款芝士ham 三文治我百吃不厭，有埋rocket 菜更好

開車往Dettifoss，最後要行一大段沙石路，聽講冬天常常封路。

又見月球景觀

泊底車後行往瀑布，全部係石路，景色原始，似登陸另一星球

見到布Dettifoss喇，瀑布水力猛，整個河谷都係水花

終於見到傳說中的雙彩虹喇

太后同我影左呢張相，我幾鍾意，發覺佢原來影得唔錯，之後繼續有比機會佢

瀑布頂，水勢洶湧

瀑布與彩虹

趴喺度睇仲刺激，留住這一刻

話說我同美魔女之前兩個人去過幾次旅行，悶悶地時我提議不如玩個「今日膽搏膽」遊戲，即係做一d平常唔會做的無聊嘢，例如著套睡衣出街之類，後來為免有辱國體，一直無玩，今次在瀑布頂行來行去，真係好有「今日膽搏膽」的感覺

點知太后居然話要影相，仲要行到咁出，嚇死人

情侶最重要係啱節奏，相比之下，其實美魔女比駕駛員更配合我的節奏，忍唔住同佢影張情侶相