Foodie 生活雜誌

(門面光鮮，入面似一間菜記改裝，想像將所有卡位同細枱搬走，放十張大或中枱入去的景像，清潔程度一般，街坊生意，我無乜要求)

12/2018光顧 

多謝foodie 友好介紹，平價菜館但出品不俗，晚飯有煲有肉，有魚有菜，加埋甜品啤酒，雖然唔係咩高級食材，但八條友食到飽飽至係每人百五蚊，我真係懷疑佢計錯數。柴娃娃朋友聚會，經濟實惠之選。

招牌一口骨 即係糖醋排骨，炸得過火左少少，但味道唔錯，甜甜酸酸又香口

羊腩煲跟生菜一碟 味道適中，唔會死咸，羊腩有肉入味又夠腍，但我嫌枝竹又乾又燶左，腐乳醬無調味，幾咸。其實我食羊腩煲主要食枝竹馬蹄同腐乳醬，羊腩反而係其次

椒鹽白飯魚 白飯魚肥嘟嘟，上枱時以為係瘦版九肚魚，炸得乾身香脆，上面撒上炸蒜，更香口

豆苗 炒得碧綠唔油膩

脆皮炸雞 見佢上枱時拎立立已經開心，雞肉滑皮香脆，點埋甜豉油食更好味

臘味糯米飯 水準一般，都係蒸熟腍pat pat，不過就好足料，有好多我喜歡食的潤腸，所以我都食多左一啖，近年都無食過突出的糯米飯，大家有好介紹嗎？

油鹽水花甲 花甲肉嫩爽甜，蒜子好味

蒸鱔

椰汁馬豆糕 自家製，馬豆大大粒，幾香又唔太甜

焗西米布甸 若食餸唔夠飽，食完呢個一定飽。我從來只在鳳城至會點呢個甜品，估唔到呢度都有，仲做得唔錯。雖然焗燶左少少，但入面的西米大大粒，加埋蓮蓉，好飽肚，唔太甜，剛剛好。