Foodie 生活雜誌

11/2018光顧

睇TBB飲食節目介紹，覺得幾吸引，咁啱朋友試過小菜話唔錯，想試私房菜，大家一拍即合，夾左一圍開心食。菜色標榜古法手工菜，但我覺得最有手工係隻碟，好浮誇，見過下世面的我都嚇左一跳，菜名都好勁，唔對住菜單都寫唔番出來。可惜食物味道一般，價錢唔平但質素普通，雷聲大雨點小，。我估要試就試小菜好了。

隱身在大角咀的小菜館，無想過菜色上枱會咁大笨象，係個反差嚇左我一跳，餐廳設計簡潔，不過平日晚上都爆滿，仲要係大枱，大家都來食私房菜，幾出名

傳奇國寶京酥鴨  一上枱見到個賣相我堅係呆左，之後笑左，又龍頭又閃燈，勁浮誇，似80年代的國內酒家。鴨肉酥軟入味，鴨內釀滿糯米蓮子及瑤柱，蓮子清香撲鼻，整體味道不俗，一個不錯的開始......除左隻碟

失傳煎釀太子魚肚 魚肚內釀入梅頭肉碎，用鮑汁煎煮 魚肚索哂茨汁，但茨汁好重口味，唔啱我

失傳霸龍伴舞九天 鮮墨魚起片卷住蝦肉、火腿及蘿蔔，配上千島醬味的秘製醬汁。呢道菜幾特別，墨魚蝦肉彈牙，不過醬汁太霸道，搶哂食材的味道

炸蟹蚶  幾彈牙，我一向對呢個菜式興趣不大，所以無乜意見

雲彩蝦參千層脆 腐皮捲住瑤柱、竹笙、蟹肉，但我全部食唔出，因為實在炸得太油太滯，我直頭完成唔到呢舊嘢，成口油，食到一半放棄

老火煲第一狀元紅湯 湯料有蜜瓜，木瓜，螺片、花膠，味道類似爵士湯，湯料一大碟，聲稱煲左六個鐘，但唔夠溶，味道比想像中淡

古法羊腩煲 羊腩多肉，配料多，幾好味，但我眼濶肚窄，點多左，結果食唔哂，嘥左

秋冬通常點豆苗

食友好識嘆，自備冰袋雪好白酒帶來，我可以坐享其成，感謝