Foodie 生活雜誌

(酒店外貌，一間似校舍的小建築 。圖中的車係今次的戰車，toyota wish，7人車坐4人，尾箱好多位放行李。)

我認為此住宿未到酒店水平，不過係一間清新的小旅館。揀呢度係因為房間夠大，有30m，價錢合理。酒店在民居範圍，生活機能性高，行幾步就係24小時玉出超市，附近好多餐廳，顧客以本地人為主，試左間串燒店，水準不俗。步行二十分鐘內可以到難波、木津市場及黑門市場等遊客熱點 (我喜歡行路，步程30分鐘以內的距離我都係行)。唔喜歡行路的可以坐地鐵，御筋堂線大國町站，坐去難波梅田都唔使轉線。6號出口步行5分鐘就到酒店，只有6號出口有𨋢，方便搬行李。離開時我推住29吋重24kg行李步行去南海難波站都只係二十分鐘左右，自覺幾方便，又唔會好似心齋橋一帶咁多人，住在民居中感覺生活化，又有另一種感受。不過若你要超方便的心齋橋區就唔好揀呢度。

從機場至酒店可以坐南海特急至難波站，步行20分鐘或坐南海特急至JR新今宮站轉車至今宮站，步行10分鐘至酒店。若平日出入坐地鐵至大国町站6號出口步行5分鐘

資訊 :

Midi Hotel

地址 :大阪市浪速区敷津西2-13-19

電話 : 06-6648-0100

門面簡潔清新，令我心生好感

內部裝置似一間hostel

走廊唔係密封，尾房門對住走火梯，感覺無咁安全，我地其中一間房係尾房，住左三晚，平安無事，反而比走廊內的房間清靜。

每層都有common area，有水及微波爐

入房除鞋

房間設計簡單，全無多餘裝置，房間使用獨立分體式冷氣，外面天氣冷，我嫌衛浴內唔夠暖。

有個手機提供，比你search 下附近景點、食店，不過係日文，我無花時間研究。

房間夠大，放完床後仲可以放一張梳化床。

我最喜歡的衛浴三權分立 : 浴室，便座，洗手盤分開，唔使等來等去

浴室分淋浴同浸浴間，有小櫈提供，幾認真

房間有小冰箱同電水壺

洗衫房在地下，有雜誌提供，等洗衫時可以打發時間

早餐好抵食，我500yen一位，去便利店買個飯團加咖啡都要二百幾yen，呢度食唔使四圍行，食物選擇都唔算少，餐廳小清新裝修，食得過

再唔係去日本茶記，四百幾yen一個早餐，感受一下當地生活節奏

行幾步就係玉出超市，24小時，旁邊的local 百貨店都開到凌晨一點(內裡的藥房關10點)。瞓唔著可以過來shopping。

圖中的箭咀係地鐵6號出口，去到地面轉入去直行，見到LAWSON轉石就係。若去完街回程時想去玉出超市行下就揀2號出口，轉入內街，總之有G神(Google )就無煩腦。