9/2021光顧
而家喺香港食飯好恐怖,名店full到滿瀉,呢餐都係臨時攝位,餐廳搬左,師傅都轉埋,原本的chef mori 走左, mori 走左,餐廳改名雲隱,由健師傅主理。健師傅喺mori 北角店已幫手,如今升格為師傅,戥佢開心。食材仍然優質,但口味偏重,今餐的亮點係大蜆,唔係成日遇得到。自10月起開番午市,師傅話午市會做番多點傳統江户口味的壽司,就等健師傅慢慢建立自己的風格吧。
餐廳食材仍然高質,供應商不變,但健師傅應該就唔似mori咁手鬆,始終mori較藝術家脾氣,但求高興,不計成本,唔係人人做得到,我當然希望健師傅能師𠄘埋呢個特點🤣餐廳吧枱有十二個位,健師傅一人hold哂全塲,其實餐廳仲有其他師傅,不過所有食客都指定要健師傅,見佢有點吃力,有時放低件壽司連食材係乜都無講就行開左,咁樣我就覺得有點唔健康。希望佢可以招攬多一兩個穩定的師傅,咁餐廳至可以長遠健康發展落去。
當日午餐 :
伊左木
池魚
平政
甜蝦
金目鯛
石垣貝
大蜆
三文魚子
中拖羅
大拖羅
海膽
海鰻
蔥吞拿魚腩卷
玉子
午市套餐的蟹肉蒸蛋、味噌湯及咖啡
餐廳搬左去石板街旁的大厦H code內,地方大左,吧枱由8位變左12位,再加一間六人房,記得以前mori已話之前的店坐位太多,以後再開想開只有六位的餐廳,唔知佢日後的新餐廳會唔會達成目標呢?
有炭火燒烤,但塊玻璃唔知搞乜?
全站熱搜