5/2021光顧
香港鮨店多如繁星，質素參次，雖然食開一間，但有時又會試下其他，通常睇下食評睇下相，合眼緣就去，今次試呢間。由香港人師傅主理，食材質素不俗，看似簡單，無話煙燻火灸，但又處理得有心機，穩陣的一餐，可以再試，睇下可唔可以做日常店。
師傅好健談，又會成條魚攞出來影相，啱哂呃like。當日同師傅傾開飲食潮流，話而家有好多人睇IG 開飯網揀餐廳，有時一個負評會令d客cancel 或no show，師傅都好無奈，唯有安慰佢咪咁上心，但又好難怪佢，打開門口做生意，見到被悪意負評影響，真係會無心機，只能做好自己，若放唔低就唔好睇了。當日我同師傅講 : 我比好評你，加油💪🏻
沙律，前菜 : 湯葉，蒸蛋
當日午餐12款食品，有壽司及小食 (食物名稱按圖次序由上至下，左至右)
彷彿魚
明石鯛
金目鯛
間八
八爪魚
富山白蝦
芝海老
關鯖魚
中拖羅
大拖羅
赤身
平貝
鯛魚白子天婦羅
海膽
食材新鮮，有幾款魚有魚味，當日的關鯖魚同間八都唔錯，海膽手卷攤開比你影左相先，似我睇人地喺富小路食海膽咁款，吞拿三味都唔錯，柔軟無筋，醬油漬赤身我一向麻麻，因為唔鍾意個質感，不過每次試新店，師傅都會好有自信地叫我試下佢的出品，我通常唔好意思推，比面食一次，不過若再去就唔會試囉。當中加插兩款熱食，白蝦炸得香脆，係好好的下酒菜，天婦羅鯛魚白子，主要食軟綿綿的口感，天婦羅做得唔錯。
上一堂魚類課
有時套餐受價錢所限，較特別的食材唔包，我通常食完個餐若唔夠喉，會問師傅有乜選擇，今次選多兩款 ：
鬼蝦 蝦肉肥美，放上蝦頭的膏，味道更香。彌補套餐內芝蝦的不足。
醬油漬山女魚黃金魚子 咬落比較硬，喺口內卜卜聲，魚油較清新，無三文魚子咁油。師傅話山女魚子喺未經油漬之前係金黃色，因為山女魚生長在山溪內，唔似三文魚沉到海中。所以魚卵唔會吸收大量的蟹紅素及蝦紅色素，所以係呈金黃色。又長知識了。上網睇過，又真係好金黃
套餐連味噌湯或小烏冬，作為一個大食積，當然食烏冬，包咖啡，無影相
師傅鍾意成條魚攞出來，咁我又影下囉，唔好失手勢，有客人追加螢光魷魚，因為當造，大大隻好靚仔。
食到尾聲，師傅準備晚餐食材，可能當日心情好，開左隻靚海膽，在座客人一人一瓣，大家開心
咪以為雪櫃內的係豬腸粉，其實係八爪魚的爪切左吸盤
餐廳在商厦內，以為細細間，原來入面好多座位，除左吧枱，仲有卡位，散座，獨立房，我見得一個師傅，若果客滿，我懷疑師傅點做？
留言列表
香港食食食 (25)
