時興from farm to table，泰國咁大，除左盛產稻米之外，仲有其他農產品及家禽。餐廳地方舒適瑰麗，餐具華麗，似食宮廷菜。套餐內菜式傳統與創作兼備，侍應態度好，解釋詳盡。呢餐食得耐過法國菜，但一點都唔覺耐。美中不足係我自己時間預得唔好，只得兩小時食，最後甜品要打包。連侍應都一臉可惜地問我點解要咁快走。一間色香味俱全，連女侍應都好養眼的餐廳，有時間不妨一試，可以網上訂位。菜單應該係每季一款，訂位時可以在網上睇到。當晚係winter season menu ，一坐底見到枱面有兩款餐牌，一款2910bts一位，一款5900bts一位，我幾驚自己點錯左5900bts個餐，唯有強裝鎮定再扮勁問侍應有無5900個餐供應，好彩佢話今日無供應，只作參考，嚇死我。
後記 : 智障的我，去到spa至知book 錯時間，spa做唔到，晚餐又食唔完，仲要蝕埋坐車Grab的車錢，絶對失敗！
資訊
唔飲酒，例牌點兩杯飲品。唔記得係乜，只記得幾好味
welcome drink 茶具靚，出哂煙，整件事浮誇得來又elephant，我鍾意
Amuse Bouche 繼續浮誇落去 玻璃盅內係米粉皮包住鯖魚及泰式香料，放上魚子，好睇又好食
11 years old Salad 侍應話個沙律做左11年，所以叫11years old salad 。仲特別用汁醬在碟上寫出11，不過寫得幾醜樣，似乎要練習下。大蝦爽甜，外面彈牙，中間半熟，更鮮甜，芭蕉花好清甜，配上泰式香料獨特味道的醬汁，好味道。
有人唔食牛，我訂位時已通知左餐廳，但其實佢又食唔到生蝦，呢個我無講。切開至知隻蝦係半生熟，本來打算由我食埋隻蝦，但見對家成碟未郁過，即管問下可唔可以整熟隻蝦，點知個侍應好似自己做錯事咁，係咁say sorry，我又係咁say sorry，話自己無喺訂位時講清楚，碟蝦就喺一片sorry 聲中退回廚房，幾分鐘後再上桌。真係服務一流。
Amazing Journey of Thailand 烤雞、鮎魚、牛肉均產泰國不同地方，製成三款小食，再配上泰式香料醬汁，帶你味遊泰國。
以魚露及咸蛋黃為主角的前菜，配合米糕，好有趣新鮮的配搭
新奇好味的前菜部分告一段落，以桑子雪芭清清味蕾，迎接主菜。
主菜一次過上，放滿一枱，風格亦由modern 改為傳統。主菜全部二選一，點菜時侍應提議我地每人選一款就可以試哂所有食物，我當然聽話。
兩款湯用咖啡的虹吸法滴漏出來，過程中湯汁盡吸香料的氣味。
冬薩功湯 湯的配料大蝦及草菇已放在碗底
在碗內注入濃湯，湯味濃郁香辣，我飲左幾口已頂唔住，相信我係飲唔到正宗的冬薩功湯，但又好喜歡個香辣味，結果每次都要對家執手尾
另一款係烏雞清湯 湯的配料免治雞肉及龍眼已放在碗底
湯清甜，似中式湯
主菜齊全，開動
咖哩分N咁多款，不同地方有不同風味，又分紅、黃、青咖喱，有甜又有辣，我對咖喱興趣一般，乜都唔識，只分食唔食到，因為味道太濃太霸道的咖喱我係頂唔順，好彩呢個黃咖喱口味柔和
鮮甜的藍蟹蟹肉一梳梳放滿碗內，嗜蟹的我食得開心滿足
咖喱黑豚豬手 肉軟腍，咖哩味濃，跟豬肉好配合
兩款類似小食的菜式，小碗內放上蘸醬，用來蘸蔬菜及配菜，好好味。兩款醬一甜一辣，一款配燒肉，一款配蝦。所有汁醬咖喱再配合天下無敵的百搭~泰國出品的米飯，真係食到汁都撈埋。餐廳標榜用新米，特別香。我只見米飯粒粒晶瑩通透，飯味又唔覺特別香(忘記影相)
炸sea bass，外脆內juicy，我知道炸燶魚唔係traditional
甜品時間 一餐如此高質素的晚餐，甜品當然唔馬虎。朱古力做的可可殼內藏雜果及mouse，再配雲呢拿雪糕
迷你芒果糯米飯
petit four 都好精緻，不過我食唔切，要打包
香草茶
餐廳喺住宅區一大間平房內，佔地幾大
原來餐廳攞好多獎呢
餐廳風格華麗
進入餐廳前，先在酒吧稍作休息
庭園
庭園旁邊係private room
進入餐廳
以柚木裝飾為主，感覺高級清雅
餐具都好靚
留言列表
香港食食食 (25)
