Foodie 生活雜誌

Greyhound cafe 的高貴版。Greyhound品牌以時裝起家，之後進軍飲食業，愈戰愈勇，分店開遍海外，搞到我都差點忘記佢本業係時裝，見到時裝店時仲以為搞crossover，後來recall番，至醒起以前我來bkk，最愛行siam centre，當時有好多未成名的時裝設計師開店，設計充滿玩味又大膽，類似香港的百利商場，行得好開心。不過在如今全球一體化以後，變哂連鎖店的天下了。

離哂題，講番餐廳。食物以西泰混合的煮法，煮得用心，擺盤清新，名菜如單骨雞翼，檸茶的冰用番檸茶做，等杯茶唔會因冰溶而溝淡茶味，呢類餐廳今日已經成行成市，但greyhound當年開業時，係一個幾新的嘗試。菜式選擇多，cafe加餐廳型式，女士可以來tea 一tea，一家大細來食飯又得，開業多年，水準穩定。唔似得香港店，又貴又唔好食。

餐廳在Siam paragon 地下，同層有好多餐廳，曼谷同日本一樣，大商場內的餐廳質素都唔錯。開放式餐廳，最吸睛係用餐具做成的大吊燈，有趣得來又幾高貴，整間餐廳更有型格。

久違了的檸檬茶，茶味濃而不澀

香蕉smoothie ，加埋個雪糕，飲完都半飽

下午茶都有餐包食。熱辣辣的墨汁包，仲有埋牛油及橄欖油醋，好有誠意

單骨雞翼 炸得乾身香口，帶點香茅味，食唔停口，一個人都食得哂

芝士蟹肉多士 半溶的芝士加蟹肉放在鐵pan內，蘸麵包及薄餅食，好惹味，雖然咸左d，但都好快食哂