Foodie 生活雜誌

2019曼谷遊 住宿篇 Hotel Nikko Bangkok@Throng lo

酒店開業約一年左右，非常新淨，位處日本人聚居的Throng lo區，離BTS Throng lo 站只需兩分鐘步程，酒店基座係商場，入面有多間餐廳，仲有let’s relax spa，附近食店，按摩店齊備，之前分享的餐廳Am-dang-typhoon 及 R-HAAN均在步程之內，非常方便，不過大型shopping mall 欠奉。房開光猛寬敞，設備齊全，衞浴分開，係我喜歡的設計。早餐有兩間餐廳選擇，食物豐富，好滿意的一間酒店。

入房

king size bedroom 房間，好寬敞，一列落地大玻璃，好光猛

衞浴及衣櫃置於走廊兩邊

浴室設有淋浴間及浴缸，一般高級酒店浴室格局，浴缸玻璃有電動簾

衞生間大小適中

walk in closet，電子磅，熨斗有齊，愈來愈覺得酒店有熨斗係好事，有時要著好少少去食飯，件衫皺晒，無熨斗都幾煩

Pantry

4K 電視。平時我好少留意電視，但今次帶左套高清紀錄片來睇，畫質堅靚👍🏻

房間細心位 : 設有Pillow menu ，不過本身房間提供的枕頭已經舒服，無再揀。用泰國名牌PANPURI洗護用品，深得我心。風筒Watt 數大，good。多功能speaker，聲音質素一般，但一駁藍牙全房間每個角落都聽到音樂，算係咁。

酒店離BTS Throng lo 站好近，喺房間内都望到個站

車站出口都標明酒店名，可想而知係近到一個點

大堂樓底高，接待櫃位背後的花紋似上等牌LB 的花紋，有氣派

臨近聖誕，配上白色聖誕花的聖誕樹，加上丹頂鶴裝飾，清雅。

大堂茶座，high tea地方

大堂旁的上網處，今時今日個個有手機，用唔著，但我欣賞的係左手面一壺浸住橘子，冰涼的飲用水

酒店特別之處係有兩間餐廳提供早餐，先講地面層的日式餐廳。餐廳只提供日式料理，相對而言選擇比樓上餐廳少，不過人都比較少。多心的我只喺呢度食左一日早餐。

室內佈置 : 多條木條在天花垂下，令我想起餐廳Amber

全日式食品，亮點係堂煮玉子卷，自助淥烏冬，炭烤鮭魚。

好彩可以點肥威，唔係普通黑咖啡

六樓餐廳早餐好豐富，講得出的食物都有，曼谷酒店特色之一

西日式食物、粥粉麵飯乜都齊

對於我，亮點係鮮榨果汁及egg station。pancake waffle 都有

餐廳外接泳池，我食完早餐在露天梳化嘆咖啡