Foodie 生活雜誌

11/2019 光顧

喺不同的食評中都睇到對呢間餐廳的正面評價，不過晚餐好貴，來試下午餐先。餐廳地方清雅，侍應細心服務好，點左兩個套餐，即係全個午餐餐牌都試左。食物味道偏濃，我口味偏淡，唔啱食。意大利藉侍應知道我覺得味道咸，好緊張咁來向我解釋廚師只用天然調味料，我叫佢唔好緊張，只係個人口味問題，餐廳好注重食客反應，俾好事。聽佢講左一堆英文，頭都痛，再同本地侍應傾開，佢話餐廳菜色口味係偏重，唔止我，好些食客及佢自己都覺得係。不過我要講清楚，食物唔係唔好食，只係不合我個人口味。

麵包外皮脆，內裡柔軟得來帶煙靭感，配上濃厚的橄欖油，好食。

minestrone 蔬菜湯，無加蕃茄，好清甜，係全餐最輕口味的一道菜

Battlematt cheese flan 芝士加入蛋漿焗成布甸蛋糕，蛋味重過芝士味，配上藍莓醬及 peer mustard sauce，兩個sauce 甜甜地，幾好味，不過覺得似甜品多過似頭盤

Carbonara 自家製蛋麵有咬口，蛋汁香濃，可惜咸左d。再加埋幾片充滿咸香的意大利脆火腿更加咸上加咸。火腿要另加$98，不過完全無問過我加唔加，我係埋單時至睇到。我以為唔講即係唔加，以後要留意下。

risotto 加入芝士牛油及香草煮，味道濃重，真係堅咸，我食唔哂

慢煮鱒魚 鱒魚滑，同其他慢煮魚一樣，侍應知道我唔食得重口味，在未有詢問我之下，叫廚師將調味減輕，雖然好細心，但我係想食廚師最原本的手勢，結果碟魚無味，靠個garlic sauce都救唔到幾多

煎珍珠雞脾 侍應話係一隻size 較大的雞，好彩我之前睇左餐單，問左G神，否則唔知係珍珠雞，雞肉嫩，外皮香，味道好。菜泥味淡，整體一般。

甜品 蘋果批

咖啡都係好濃，有hazel nuts伴飲

餐廳在銅鑼灣食厦Cubus內，地方清雅舒適

一例酒櫃做間隔，分開半開放式空間

半開放式空間，一列落地玻璃，好開陽，雖然都係室內，不過跟大廳的感覺大不同

private room 

minimum charge 午餐$10000 晚餐$20000

牆上掛畫好有趣，侍應話係大廚的名畫家朋友所畫

白松露季節，侍應話$48/g，好抵食，佢攞出來比我聞下引我，不過我食唔起，幾香都無用。講真，我又唔覺得吸引。

午市餐牌

晚市餐牌