Foodie 生活雜誌

10/2019光顧

若果唔係有善長關照，我一定唔會嚟食晚飯，因為傳統大酒店，感覺又貴又拘謹。想當年餐廳曾經係城中著名意菜餐廳，不過今時今日選擇多左，餐廳亦少不免有點沉寂。可能因為當晚客少，氣氛輕鬆。傳統意大利餐廳，菜式傳統，味道不過不失，賣相平實，毫無光彩，雖然一向拒絶比較，但若以同等價錢，水準比佢高的餐廳多的是，只係餐廳環境氣氛始終有優勢，落地大玻璃海景，雖然對住地盤，但睇遠d都可以接受。招呼不俗，酒店應有水準。

grissin長麵包 用得嚟做餐廳名，當然水準有番咁上下，新鮮焗製，麵包上枱時熱烘烘，外脆內軟之餘又帶點煙靭嚼勁，配上濃郁的意大利醋，好味。

朋友例牌開酒(冇影相) 頭盤burrata cheese及culatello ham點來送酒。喜歡食culatello ham，相比起parma ham更柔軟，不過唔係好多餐廳有供應

King crab linguine 賣相及味道皆一般

黑松露釀春雞 二人份，西洋陶瓷燉盅幾靚，不過雞唔香又唔滑，食落有點蠔油炆雞feel。

tiramisu 一大盤舀出來，mama’s recipe feel

濕度剛好，cheese 軟滑，好味道，若果唔係太飽真係想食多碟。

餐廳裝修後重開，我對上一次來已經係一萬年前，已忘記之前模樣，不過好似係光猛左。當晚餐廳只得寥寥幾枱客，侍應居然安排我坐餐廳側面條柱後面張枱，經我要求之下至安排海景枱，我都明白我唔係熟客，但反正無客，又何必咁孤寒呢😜

一列落地大玻璃已經係餐廳最好的裝飾。