Foodie 生活雜誌

(相片取自開飯網)

9/2019 光顧

朋友一句「我想食藍青口」，當然立即做嘢。想起在附近呢間開左好耐，成日都好多食客的餐廳，confirm 左有藍青口就去食。點左幾樣食物，款款水準都唔錯，唔係一般的高級快餐，難怪可以租埋隔離鋪位擴充營業，用心做的小店，加油💪🏻。

晚餐飲品買一送一

水果茶，足料

晚餐做套餐，每點一個菜都附送麵包同餐湯，磨菇湯滑，蒜蓉包軟熟，唔係hea做

藍青口滑嫩，size剛好，証明選擇食材認真，餐廳無用一般的白酒煮，用帶點辣的蕃茄蒜蓉汁，幾惹味，意外驚喜

帶子意大利雲吞 知道係餐廳自製雲吞，即點。雲吞皮厚薄適中有彈性，雖然芝士饀有點膠，但都算交出水準，帶子煎得香嫩，醬汁味道及濃稠適中，整體滿意

鵝肝多士 聽到侍應同隔枱食客話用真正鵝肝，唔係用鴨肝，好抵食，我當然唔蝕底點一客。講真，我唔識分鵝肝同鴨肝，不過呢塊肝鬆軟肥美，油而不膩，唔理鵝肝同鴨肝，好味就得 (低水平食客😜）

Carbonara 蛋汁香而掛麵，意粉有咬口， 感覺剛剛好，食得舒服

西班牙黑毛豬 豬扒烤得外香內嫩，配薄薄的gravy，簡簡單單。食到呢度已經幾飽，但仍然覺得味道唔錯，算係咁。

同一條街開左幾間小店，有西餐、麵食、清酒居酒屋，目測間間都好似幾好，我食過最頂的青藏牛肉麵，覺得ok，下次再試埋其他先。

加開店在旁邊，地方細細，可以坐十幾人，人少少可以考慮包場