Foodie 生活雜誌

喜歡來食早餐，IFC店及圓方店都食過，圓方店改組後只做零售，餐廳移師至又一城開新店。一貫高貴亮晶晶英式茶室佈置。今次來食晚餐，點左兩個full course ，餐點特別之處係以茶入饌，但食落又全無茶味，只係一般西餐水準，味道不過不失，水準同我的期望有落差。不過連加一四百零蚊個晚餐，包頭盤主菜甜品連名牌茶，加上靚靚舒適環境及殷勤服務，我收貨喎。

晚市有set dinner 有 a lar cart ，我一心來食set dinner，無睇a lar cart 餐牌。

套餐包一杯tea list 上$85的茶，tea list 好長，慢慢揀

餐包 牛油上加左用茶葉烘過的紫菜及脆米，帶點焙茶味。麵包軟熟

頭盤可以選湯或沙律。是日餐湯係蕃茄湯 是日餐湯。用蕃茄打蓉做湯，唔夠濃稠，欠口感，蕃茄味淡，唔湯唔水。

若唔選湯，可選另一款沙律頭盤 個名好複雜，簡單而言就係奄列加沙律。攞碟唔吸引，奄列話加左羅勒及黑橄欖，但實際上係無乜味。雜菜沙律上的煙燻伯爵茶醋完全食唔出茶香，同普通黑醋無分別。

帶子伴伯爵茶高湯意大利飯 又係全無茶香，味道偏咸，可幸帶子煎外香內嫩

慢煮羊肉 感覺似食鴨胸，羊肉無想像中的嫩，味道一般

自選甜品 雲呢拿拿破侖，雲呢拿cream 香，酥皮雪得硬左d，無哂酥脆鬆化感，不過若你唔當係拿破侖，其實幾好食😅

芒果mouse 開朱古力外層，裡面係mouse 蛋糕同芒果肉做成的流心sauce， 多種口感，我喜歡

Snow needle 我對白茶有莫名的偏好，喜歡佢淡雅清香，不過價錢貴，呢杯要$88，所以要加多$3。我喜歡店家的white earl grey，既有橘子的香氣，茶味又唔似黑茶紅茶般濃，不過價錢實在貴，買左一罐都慳住飲。

 Tea list 好長，朋友花多眼亂，請侍應先生代為選擇，佢選左Renaissance Tea （無影相）佛手柑焦糖紅茶出奇地討好，帶甜的香味及不太濃的紅茶，好適合作為一餐的總結

餐廳在中庭樓層，一片落地大玻璃，簽名式裝修，好易認，同IFC店一樣，店面分兩邊，一邊賣茶，一邊餐廳

餐廳空間有點細，不過當晚客人唔多，唔覺得迫

甜品櫃及調茶吧台

另一邊賣茶及茶具，茶壺放滿櫥窗，似展覽

茶具都好講究，每樣事情一認真就可以有好多學問，我對所有事都唔多認真，所以通常只影相