Foodie 生活雜誌

荃豐中心@荃灣

好多人話香港的商場一式一樣，行一間等如行十間，其實若你有心發掘，香港都有好多有趣的小商場，好似呢個荃豐中心，喺荃灣地鐵站綠楊新村出口附近，一條通道連住四個商場 : 荃豐、華都、荃昌、昌寧商場。內裡小店五花八門，亂中有序，仲好多小食店，非常地道的街坊商場，好有趣，若你喜歡行日本仔都推薦的秘密景點葵涌廣場，咁你都應該過來呢邊行下。呢類商場貼近民眾生活，店主可以做下小生意，客人又可以享受較平的消費，實在係雙贏，大業主開高檔商場招呼高端客户之餘，可唔可以都喺手指罅漏番少少出來，比我地升斗小民都有個喘息地？

四個商場 : 荃豐、華都、荃昌、昌寧商場，連成一線，每個商場有3層，好多鋪頭，人流極旺。入口的荃豐商場以時裝店為主，我N年前都喺度買衫，咪睇相內店鋪門庭冷落，其實繁忙時間係平日下午到傍晚，好多呀太同OL幫衫，以前好多歐日牌子，幾千銀件褸都有，如今好多都轉左做網店，只開短時間同熟客吹下水。

樓下係電腦廣場，女人行街時男人都有嘢睇下

參茸海味店，眼鏡店都有

整遮店都有

進入華都中心及荃昌中心就開始熱鬧，食店都多，滷水店、茶餐室、素食店、泰菜、鍋貼、川味小食、西餐小廚房、拉麵小籠包，間間店鋪位細細，好唔好食我唔知，不過幾多人幫襯。

當然唔少得呢間喺度茁壯成長的餃子屋，之前只有一個鋪位，如今一變二，店面大了，仍然客似雲來。抵食夾大件，不過唔啱我

之前食後感 :

https://hearoom.pixnet.net/blog/post/348039826-6-2018-光顧-餃子屋%40荃灣荃昌中心

葵涌廣場名店小雨天都喺度設店

呢兩個商場仲主攻美容，剪髮facial，美甲浸腳，由頭照顧到落腳

無花假，指示牌上九成店鋪都揾到

若你唔喜歡商場內的小食店，行多前點去昌寧中心地下，有幾間濶落點的街坊店，小菜，泰國菜，西餐廳，咖啡輕食店都有，好豐富的街坊食堂

台灣便當都有，不過環境真係好地道

呢間食過

https://hearoom.pixnet.net/blog/post/342699208-食得喜小廚%40荃灣荃昌中心地下

呢條小巷已經有3間咖啡店，勁

其中一間食過

https://www.facebook.com/355756624585953/posts/1280013868826886?sfns=mo