2018冰島丹麥遊遊記篇 Day 14 Copenhagen －Foodie 生活雜誌

停留Copenhagen 4日3夜，扣左頭尾坐飛機時間，實際係得兩日行，今日坐metro 出城行街，點知出師不利，買唔到metro 票，仲要被開罰單，原本DKK24一程車變成DKK720，肉赤到頭皮發麻(詳情請看相內caption)，太后仲要一副死老豆嘅樣對住我，為左唔想影響遊興，我決定快速止蝕，整理心情，再鄭重同太后講 : 我唔要再聽到車票同罰款兩個字！往後的時間佢就轉移去煩駕駛員。丹麥的市容整潔，舊城區大部分景點距離都在步程之內，係一個非常適合散步的城市，更可以租單車四處遊玩，不過我同太后一齊，雖則景點全部係可以行去，但加加埋埋就行得好甘，太后雖然盡力配合，但老人家唔行得咁多，我只好簡單地行左幾個地標(新港、圖書館、皇宮)，食埋飯就返歸了。

出師不利，坐無人駕駛metro時，因為喺售票機有問題，只買到一張，另外3人無飛，打算先上車，到站再補票，在車上遇上職員查票，我主動上前解釋，出示已購買車票及好多被取消購買的票據，可惜職員仍然鐵面無私地開罰單，雖然最後由三張罰單求情至兩張，但仍然係大額罰款，心情大受影響。回程時又唔識買飛，嬲得滯，結果坐的士回去😡

之後一日每逢有機會同任何當地人交談都呻呢件事，包括sales，tourist information 的staff，pension host，網主，每個人都好同情我，佢地仲有個共通點，係每個人都話丹麥係一個公平公正的國家，呢個罰款係不合理的行為，叫我投訴，有人更叫我唔好交罰款，好搞笑。其中一人更提供左metro 英文的email address 比我，叫我寫信去投訴 (因為網頁打開係丹麥文，完全睇唔明)。回港後，我去榕樹頭揾人幫手寫個英文email，搞左兩星期後成功撤銷罰款，好開心。下次真係謹記，買唔到票寧願坐的士。