Foodie 生活雜誌

12/2016 光顧

荔枝角D2Place 一帶開左好多餐廳，又好彩地我試左幾間都唔錯喎。呢日星期日來食個weekend lunch，之前晚上經過見裝修簡潔，又有個鬼佬廚師(我係崇洋呀，吹咩！)好似幾有feel，決定來試下。喺門口見到個menu頭盤加主菜由百幾至二百幾，再要加一但唔包飲品，都幾貴，但點都平過隔離salty pig 一個班尼迪收$148，決定入去，好彩食到尾至知包個dessert buffet，感覺抵哂，其實餐牌寫左，但崇洋唔等於識英文。整體都幾好味，pasta做得唔錯，坐得舒舒服服，雖然份量偏少，但百零蚊個餐都算係咁，麵包任添，叫多兩個補數，有機會再來食pasta。

麵包任添，熱辣辣，有咬口

同無主意的朋友來食，兩個餐我揀哂。頭盤點左火腿包軟芝士，火腿的咸香配上淡味的軟芝士，無論味道同口感都好合我心意，伴碟的蔬菜夠新鮮

另一個都係我喜歡的蛋餅 凍食，有蛋香，belle pepper 清甜，配淡淡的tomato sauce ，好味

主菜兩個都係pasta，朋友的蕃茄豬面肉penne又香又濃，penne煮得煙靱，好味 。另外有扒可以揀，但午餐唔想太heavy，不過見隔離枱的羊扒幾靚。

我點的什菌caesareccie 一樣咁好味，香濃的醬汁配上juicy的mushroom，pasta 質地咬落彈牙煙靭，好有水準。

甜品有六款選擇，普普通通，tiramisu 幾好味。

另點咖啡，改不了永恆的卡扒千奴。細細杯，個泡好厚，咖啡好濃，泡沫與咖啡各佔一半，所以幾啖飲完。