Foodie 生活雜誌

太后因為腳痛，今日獨留家中，感謝駕駛員漏夜揾左一整套韓劇比佢做精神食糧，我地喺出城前帶佢去一次超市，等佢認下路，再萬分叮嚀後 （大家別忘記佢有過度活躍症，會自己行落街），我地三個甩繩馬騮終於可鬆一口氣，輕鬆出發，原本打算個腦休息一天，比呀笨與呀占 （駕駛員及美魔女）帶路，結果都係頂唔住，自己做番領隊。先去design museum，展品豐富，行足一日都唔悶，我當然無咁殘忍要呀笨呀占陪我，所以行左兩個鐘左右就離開。之後去最把鬼景點 little mermaid，到此一遊後，打算去shopping，要知道丹麥的家品設計好正，買唔起都睇下，點知因爲星期日，好多商店無開，唯有行大百貨公司。當我喺頂樓hea住食午餐時，亦係天鴿訪港時，人生就是如此，我地三人今朝有酒今朝醉。飯後行埋round tower 就返歸了。最後一日因為係Airbnb check out 後無得寄存行李，唯有去附近的商場fields打發時間，太后喺呢個時候發揮左佢的才幹 : 看守行李，行完就直去機場返香港，旅程結束，總算還我一個帶太后去冰島的心願。

封路只因馬拉松，全世界都係馬拉松💪🏻

Design museum ，門口在施工中

一入門口就見到大師Poul Henningsen的經典之作

好型的天花

諗住得一層，地方細細，好快行哂，點知展品咁豐富

傢具部，古今設計都有

designer chair 之庫，每一格一張椅，旁邊有看板可以拉出來，介紹每張椅的資料。椅迷必看

好欣賞的窗飾，咪以為物料係金屬，其實係一塊布，透過日光的照射，做成地下迷幻的光紋，好夢幻

邊個世紀都有fashion

日本部份，丹麥人非常欣賞日本的設計，可能大家都一樣簡約實用

似傢具店陳列的梳化，可以坐低唞唞

有snack bar， 禮品店同library 

好天氣，可以坐喺後園嘆杯咖啡後再行過

美麗的莊園

雀巢都型過人

把鬼景點，差點連相都唔想影

反而旁邊的公園更靚。其實都係古跡，但我忘記左個名，要知道歐洲處處是歴史，正所謂英雄慣見亦平常，除非你好有興趣，否則就會好似我咁，覺得度度差不多。

shopping time，小店關門，唯有行大百貨公司

直上頂樓傢品部，東摸西摸，用左不少時間

嘆個late lunch， 從手機新聞中得知香港被颱風天鴿蹂躪中，擔心香港個狗竇唔知點，諗到遠水不能救近火，決定拋開煩惱，今朝有酒今朝醉，活在當下，我覺得自己心理質素高左。

餐點可口，美魔女忍唔住吐出一句 : 「終於無人係咁叫我食嘢！」事緣太后有個好討厭的習慣，每一餐 （記住，係每一餐！）飯桌上會不停地催人食嘢，但自己又唔食，搞到人好大壓力，就算對第一次同遊的美魔女都無情講，我話過又鬧過，甚至拍枱都無用，好彩美魔女大人有大量，但都忍唔住吐一口氣，可想而知幾可怕😱

行埋round tower，歷史建築，對我唔多吸引

螺旋形通道行上頂

比左入塲費，點都行哂佢，上樓頂是必須的

例牌塔頂景色

塔頂從前用來觀星，所以有觀星儀

原本想去market 晚餐，不過關門了

返歸，見到太后全日煲劇，應該係佢全個旅程最享受的節目

旅程的最後一個晚餐，KO埋帶來的糧食

最後喺機場終於食到丹麥名菜 : smørrebrød，open sandwich ，好味

回港要轉機，中間只得個半小時轉機時間，我緊張症又發作，一早已訂定輪椅比太后，一落機即刻推太后上輪椅(後來美魔女話太后腳踏都未踩好我就開車)，過關後更開turbo去閘口，太后被我緊張情緒感染，一路叫「egg 士 Q 時mi ，egg 士 Q 時mi 」好彩我喺萬分緊張之中仲保持冷靜，叫佢收聲，唔好再失禮😓最後去到閘口仲有大把時間，放心哂