Foodie 生活雜誌

11/2018 光顧

竹，好奇怪的一間餐廳，初開業時係一間鮨店，當年鮨店無而家多得咁誇張，算係幾出名，不過試過兩次後覺得水準一般就無再去，間中會見到雜誌報導轉師傅，轉左幾次之後諗住佢做唔長，點知反而愈開愈大，今次整左個集壽司、鐵板燒及天婦羅於一身的餐廳，仲揾左著名日本建築師隈研吾做室內設計，對於呢間新店我興趣不大，但見到食友試左個天婦羅餐餐幾吸引，又試下。整個套餐同集團的宗旨一樣 : 最緊要多！套餐好豐富，前菜沙律刺身甜品都有，仲有9款天婦羅，帶點創作料理feel，食材新鮮，雖然師傅好奇怪地要做埋樓面換碟，有點手忙腳亂，侍應服務又有點疏忽，但仍然食得好開心。若你要求唔高，呢個豐富的套餐其實幾抵食，不過始終關東風的天婦羅唔係我杯茶，食到最後幾滯，試過就算。

午市天婦羅套餐，對住個餐牌食，充滿期待

前菜 擺碟精緻

櫻花蝦沙律 食材新鮮

先來幾款天婦羅 海老、露荀、沙𩺬、蘿蔔。天婦羅麵衣薄而脆，食物保持多汁柔軟，不俗

刺身三點 鮮味欠奉，食完刺身，我知道唔使來食壽司了🤣🤣

另外幾款天婦羅  蠔、粟米南瓜、青瓜花配鮮粟米汁，番薯，擺碟精緻，帶點創作料理感，款款好味

白子與松茸 松茸本身套餐包，白子我自己點，師傅放埋一齊上。天婦羅白子同海膽口感一樣，外脆內裡軟綿綿，good

穴子天婦羅 魚肉軟滑

麵豉湯及pickle 

天婦羅食哂，最後上天丼，我習慣食茶漬飯，雖然餐牌上無，但師傅都特別做比我地，好好人

甜品 生果及cheese cake

之前上完刺身後再上天婦羅，侍應居然比呢兜汁我，我問佢係咪我之前點過的，嚇死我，佢話係新的，只係蘿蔔泥散左，我接受唔到，叫佢換比我，若你要高品質服務，呢度絕對比唔到你，因為餐廳對自己都無要求。港式日本餐廳的作風。

餐廳門面簡潔時尚，要經過一段如隧道般的走廊再進入室內

一入門口就見到壽司吧

餐廳設計高雅，用大量竹作裝飾及間格，建築師隈研吾的一貫風格，我興趣不大，唔知點解感覺似高級food court，

鐵板燒及天婦羅於同一吧枱，各佔一方，真係未見過，二人同行可以各自點鐵板燒及天婦羅，好處係多元化，但感覺無咁專業

餐廳面積大，設有鐵板燒及壽司吧個室。