Foodie 生活雜誌

10/2018光顧 聚興家@太子

出名明星店，其門如市，閒日晚餐都分三輪，我選最後一輪，即係八點半，結果都要九點至有位。菜牌只有數頁，選擇少，簽名菜雞同乳鴿都無哂，無咩好揀，另有hidden menu，態度友善的老闆娘講d唔講d，無謂再問 。食材新鮮，味道正常，論環境及食物份量，價錢相對較貴，而且上菜極慢，理由係只得一個師傅，兩個爐頭，一個炒一個炸，見廚房出菜都係兩碟起，老闆亦講句 ：要食好嘢就要時間等，每次食完一碟等一輪至食第二碟，食到無哂癮。當日都遇到幾位藝員，明星效應又好，乜都好，總之係熟客來至會更好，仲要記住訂定菜至好，否則好似我咁，炒幾個家常小菜都八舊水埋單。無話啱唔啱，好唔好，願者上釣。

花甲蒸蛋 蛋滑花甲鮮，好味。

椒鹽鮮魷 鮮魷食得出係新鮮，炸得金黃香口，不俗

小炒王 一般用韮菜，呢度用蒜心，加分。豬頸肉切成粒狀，更有咬口，不過幾油膩

啫啫芥蘭 醬汁太杰，重口味

豉椒蟶子皇 呢度四隻蟶子皇，好細碟，朋友懷疑有無四隻，我估可能係切開左？反正除非好過份，否則都好難計算，可能大家對蟶子皇的大細睇法不同。但無論大定細，碟蟶子係堅咸囉。