Foodie 生活雜誌

9/2022光顧

去太子揾食，朋友提議呢間，見幾次行過都大排長龍，對面街仲要開埋分店，心諗應該可以一試。餐廳裝修不俗，坐位唔算迫夾，打開餐牌見到幾十蚊個意大利飯，已知唔好有高要求，但唔要求唔代表無要求，部份食材同烹調技術都唔得，食完後，我同朋友都好疑惑點解有咁多人排隊。

又要發下勞騷 :

話說食完後，友人話「呢個價錢係咁，唔好有要求」，我知好多人都係咁諗，但我唔認同，明白一分錢一分貨，面對平實的價格，我唔會有高要求，但係咪真係要無要求？我只要求唔難食，食價比唔好太低就得，但好似今餐，廚師廚藝非常一般，似喺屋企煎兩件扒的業餘水準，只能用填飽肚的心態去食，咁嘅質素，我寧願喺屋企煮個麵好過。

近年試新餐廳有點難度，我𠄘認我奄尖又比唔起錢，只知好食的餐廳價錢貴，新開的餐廳又喜歡整色整水，畫蛇添足，中下價餐廳的質素又非常參差，有時見到餐牌上一式一樣的菜色都覺得悶，睇完相更加提唔起勁試。以前睇食評睇到心水餐廳會儲起，但而家太多打咭post ，真係無心水，上開飯網睇，雖然明知好多伏地魔食評(尤其讚同彈的比例係兩極的餐廳，中伏機會率極高！)，但勝在資料齊全，但好多時碌成粒鐘都無啱心水，又唔想食來食去嗰幾間，真煩惱。

跟餐南瓜蟹肉忌廉湯

漿糊湯，可以不喝

白酒煮藍青口

$68一客的藍青口真係要見識下，碟頭細就預左，但無預過青口肉同煲湯的淡菜一樣size，而且味道偏腥，有其形而無靈魂的菜式，咁樣又何必呢

海鮮、黑松露牛肝菌意大利飯

海鮮係蟹柳同淡菜size 青口，都無所謂，我明白意大利飯的質地係要帶點煙靭，但唔係生米咁硬囉，不過醬汁味道不俗

德國豬手

皮不脆肉不香，整體偏乾，醬汁漿糊feel

煎羊扒

侍應問我要黑椒汁定紅酒汁的時候，我就知餐廳好地道(地道港式)食過之前的陣式，我無諗過挑戰紅酒汁，運用剔除法後，選唔喜歡但穩陣的黑椒汁。羊扒四件，兩件全熟一件半生，我好彩，我食嗰件居然幾柔軟，唔明點煎至可以有不同生熟度

脆香雞翼，水牛城辣汁，薯角

雞翼overcook ，好彩未算好乾。食薯角時朋友叫我點茄汁唔係點「辣汁」我不禁問句：你真係覺得有分別？見我係咁隊薯角，朋友話整餐來講，我應該覺得薯角最好味，我話做人要公平啲，伴菜的節瓜都唔錯。

市面上就係充斥住呢類毫無靈魂的所謂西餐廳，每次唔好彩食到都會有點炆，不過百客遇百貨，總有捧場客