Foodie 生活雜誌

6/2022光顧

朋友介紹的街坊小店，開業多年由同區邊陲位置搬入食街，應該儲左一批捧場客。湯麵湯底香濃，春卷炸得火喉合度，價錢合理，不俗的小店。

招牌生牛肉湯河

湯底頗濃厚，帶點牛骨甜味，牛肉浸在熱辣辣的湯底內，好快浸熟，肉質食落算ok。最特別係有個小碟裝左湯，入面加隻蛋撈匀食，真係未試過，我儍下儍下，將碟湯仔飲哂佢，唔覺味道有乜特別，但幾得意。當時已覺得唔對路，之後更愈諗愈唔對路，上網睇下人地的食評至知原來係用來點牛肉，等件牛肉滑d😱我居然成個土著咁飲哂佢😱😱失禮到一個點😱😱😱下次要再食過😫😫

三拼牛湯河粉

呢碗太后食，同樣係牛肉河的湯底，佢話係味精水，不過佢食坊間九成粉麵，包括同佢去「潤」食的順得魚肚羹，都係呢個comment，剩低嗰一成未遇到（希望在人間嘛！）我只試左粒牛丸，牛味幾濃，ok

海防蟹膏湯檬粉

有一排好喜歡去旺角熟食中心食海防米線，成日以為海防係一種食法，問G神至知海防係越南城市名。睇個湯底已知對辦，蟹湯混入蟹膏，湯底頗濃厚，味道未至於好好味，不過合格有餘，配料有扎肉、香菜肉丸及蝦，食友唔食蝦，丟左比我，一般雪蝦肉質，無嚟文味。

炸春卷

春卷皮鬆化餡料滿滿，合理水準

小店一間，茶記格局，迫迫夾，好在整齊乾淨，牆上放上越式調味料，食友話去全部喺越南big C 見過

餐牌設計幾精美