Foodie 生活雜誌

6/2022光顧

近年多左好多「過海龍」cafe，之前中上環創業的都開過來九龍。呢間我喺上環店幫襯過幾次，水準不俗，來到九龍，當然要試下，點知食到一肚氣，食價比低，食物質素欠佳，無下次。餐廳開左好幾閒分店，莫非兼顧唔到，搞到質素下降？不過唔止佢，cupping room, knock box 都有呢個問題。反而暫時NOC 及Espresso Alchemy 就keep到。

班尼迪

上枱見到size似縮水版，碟嘢水汪汪咁已知出事，果然醬汁稀淡，隻蛋水汪汪，塊煙肉又乾又硬，sourdough 個邊硬到切唔開，應該放左幾日，切到火滾，索性成塊攞起食，唯有塊三文魚尚可。咁都整得出來，求其到震，真係要寫個伏字。

話說朋友話我唔用刀叉食，唔優雅，我火滾地話切唔開，切到想講粗口，佢叫我唔好鬧，留番出post至鬧，因為佢好鍾意睇我喺post鬧，但我覺得好奇怪，我邊有喺post 鬧過人？佢一定記錯，係一定係佢錯😈😈

煙肉炒蛋多士

收成舊水唔係問題，間間cafe 都咁上下，但可唔可以有點良心？只得一塊包，上面就係貨真價實的蛋及煙肉，加上園林式蔬菜佈置，再整pat 顏色怪異的醬汁，朋友對食物無要求，無任何意見，但我目測已嬲嬲地，不過同一個廚房出，唔荒好食，只知餐廳賺得好盡呢

原本飲黑啡，因為仍肚餓，點杯肥威頂肚，可幸咖啡仍然香濃幼滑。朋友點冰茶。

餐廳跟上環店裝修差不多，歡迎寵物，當日我坐的時候左貓貓右狗狗，好熱鬧。附近咁多動物診所，啱晒僕人們過來歇下，不過都係飲嘢好了

過幾日去左Espresso Alchemy，$68個panini ，簡單得來有質素，唔小心又想起呢餐，即時又滾滾地😡