Foodie 生活雜誌

6/2022光顧

曾經喜愛的餐廳，之前幫襯過幾次，直至有一次覺得唔多啱食，無再幫襯，不經不覺又幾年。近排見到有雜誌介紹，心思思又試下。餐廳仍然keep得好新淨，服務好好，食物水準不俗，是日用餐經驗愉快。平日只供應套餐，四道菜同五道菜只差一舊水，(係魚or肉同魚and肉的分別)，無理由唔點五度菜，侍應話若食到三餸一湯就食到五道菜，結果証明我一個人係食到三餸一湯，不過全日都唔使再食其他嘢了。

麵包有五款，款款好味，但又唔敢食太多，怕食唔落個餐，真痛苦。

歡迎菜

輕煎魷魚配豆蓉，清新

頭盤 阿拉斯加蟹肉伴海鮮啫喱配特級魚子醬

蟹肉鮮甜，海鮮凍湯味道非常濃，食的時候聞到好濃的蠔味，但又食唔到蠔肉，侍應話蠔肉切成碎粒混入蟹肉內，魚子醬咸度適中，粒粒圓潤，咬落卜卜聲，所有食材混埋一齊，一羹到底，充滿海洋的味道。

呢個頭盤係侍應極度推薦，加左相等於普通餐廳一個晚餐的價錢，點的時候都有少少猶豫😅

soup 青豆湯伴甜蒜火腿汁配田雞腿

青豆茸濃湯好creamy，有甜蒜及火腿汁，味道更濃，反而期待的田雞腿卻切細，無乜質感，整體味道不俗

soup 鴨肉清湯配鴨肝雲吞

清湯帶著濃濃的鴨味，似用左成隻鴨落去整一碗湯，以為配上鴨肝雲吞味道會太heavy，點知更能帶出鴨湯的鮮甜，更好味。

主菜 Sea Bass 配海鮮圓米伴藏紅花汁

顏色橙橙紅紅的主菜感覺好繽紛，其實呢度菜好多地方都食到，但主廚整得好味，魚肉juicy，圓米吸收哂海鮮湯的鮮味，讚。

主菜 牛面頰伴蘑菇及香脆薯塊配紅酒汁

牛面頰筋肉均勻，非常柔軟，紅酒汁濃而不膩，配菜都好味。

我好少點呢個菜，因為過往經驗麻麻，好多餐廳都將舊肉炆到一pat咁，紅酒汁又難食，今次係押注比個侍應，又係佢極力推薦，好彩押中左。

主菜 香烤黃油雞腿配法國白露笋伴梅子汁

朋友唔食牛，揀左雞。雞腿整成球狀，擺盤靚，白露笋係我飛佛，諗住切開炒會無咁有口感，水份亦會流失，點知又唔錯喎，仍然好有水份。

甜品 杏仁疏乎厘配云呢拿雪糕

杏仁味香，疏乎厘有空氣感，綿滑細緻

甜品 法式塔丁蘋果批配焦糖雪糕

食到呢度，已經勁飽，只覺好滯，不過見到個批的橫切面，輕盈的酥皮層層叠，好靚

套餐包咖啡，petit four 好味

安排左窗口位，當日雖然天氣麻麻，但起碼唔再係地盤景。