初心日式燒肉店@灣仔－Foodie 生活雜誌

3/2020光顧

席前燒肉omakase ，喺日本食過幾次，香港好似無乜同類型店，又來見識下。晚餐提供指定set，前菜、主食、醋物，湯及甜品等加埋約10款食物，其中六款係澳洲和牛。另外可以加錢追加韓牛、䝉古牛或日本牛肉。以omakase計，價錢唔算貴，但就要將價就貨，一分錢一分貨，睇得出大廚係用過心機設計菜色，奈何食材未能配合，而且大廚對火喉的掌握亦只係一般，試過就算。

日本食過的和牛Omakase

https://hearoom.pixnet.net/blog/post/323441766

https://hearoom.pixnet.net/blog/post/350020132-2019北九州遊-餐廳篇-焼肉すどう-春吉-%40福岡

烤爐放於座前，餐廳用炭火燒烤，係吸引我的賣點之一

前菜 宮城蠔 味道一般，無鮮甜味

牛肉他他 肉質柔軟但欠缺牛味，好彩調味料唔算重手

薄切牛脷，舌心及舌尖。對薄切牛脷興趣不大，而且師傅控制火喉技術欠佳，燒得乾身，邊皮仲燶燶地。

師傅問我覺得牛脷如何，我照直講，佢燒過塊比我，呢塊好好多

燒下牛肩肉，薄切

以醬油漬蛋黃、魚子醬及蔥拌食，幾有心思，可惜牛無牛味

醋物醋漬海參，煙燻鯖魚沙律，糖漬番茄，幾有誠意，但大廚好搞笑，叫我估下杯海參係乜，我答佢係海參，佢見我知道，覺得好神奇，我反而覺得佢好神奇

上牛肩肉，以shabushabu 上，加左紫蘇花，又問我係乜，我答啱左，呢次佢無乜癮，之後無再問我問題，我亦樂得清靜。我見佢繼續好開心地叫另一組食客估，佢地可能未食過，估唔到，大廚好開心。

M5 和牛，細細舊，食落無juicy感又無肉味，一般，我寧願佢收貴少少，比好點質素的牛，好過唔上唔落

食之前大廚又叫我等一陣，佢要審鹽之花，叫我準備，我問佢準備乜？係咪要take video ? 可能又掃左佢興，但我真心覺得佢當食客係大鄉里，不如正正經經講我知好了。

最後係燒飯團 同M5和牛一齊上，唔知食得邊樣，結果當然係先食和牛，飯團唯有東歪西倒咁放喺碟邊，食的時候紫菜都腍了。

牛肉味噌湯，牛骨熬的湯底加入味噌，全晚最有牛味係呢碗湯，聽到大廚同另一組食客話呢碗湯出面飲唔到，我無言。不過對自己出品有信心係好事。

最後係燒菠蘿，柔軟香甜，照大廚所講，又係出面食唔到。

餐牌。其實個餐食到後半部份，大廚已再無同我講嘢，可能我比唔到佢想要的反應佢。但佢最後喺其他食客離開後忍唔住問我意見，我亦照直講，言談中佢都好無奈 : 定價唔敢太進取，食材成本高，只能將就，加上得一個廚，當晚有walk in客佢已手忙腳亂，畢竟只開業四個月，可能仲要調節。我都叫佢加油，祝佢愈做愈好。我唔欣賞，但有大把人欣賞，起碼開飯網無負評，我亦都希望餐廳客似雲來，因為真係艱苦經營。