Foodie 生活雜誌

多年前已經好喜歡去深圳行書城，貪佢地方大，書多，最重要係價錢平，當年書店無乜設計都行得好開心。近年更加不得了，可能因為台灣的誠品書店及日本的蔦屋書店經營成功，如今國內好多同類型書店開業，設計時尚舒適，好似今次商場內的前檐書店，設計摩登簡潔，光線充足，大量座椅空間以供閱讀，書店附設商店及餐廳，風格一致，睇資料至知原來書店係由日本代官山蔦屋書店（TSUTAYA）總設計師設計，難怪感覺似曾相識 (我係蔦粉呀😁）。客人斯文守禮，行得好舒服。簡體字書本係香港繁體版一半價錢，但繁體字書本就貴過香港。可惜今次無時間，下次要再來慢慢行。

店面係一幅水泥牆，有留白感。以薄木打造的書架，感覺輕盈，書本擺放整齊，但對於書店的細節就無時間了解了。

店內設有多個座位供客人坐下閱讀，跟日本二子玉川的蔦屋書店有點似。當年我就係好羨慕日本有此環境的書店，估唔到而家深圳都有了。

書店在商場內，半開放式，空間感強

近年書店內必有咖啡店

仲有甜品店及售賣精品的櫃位，店內居然有六福珠寶，位元堂等品牌，但放在店內又不覺突兀，真係設計師的功力