Foodie 生活雜誌

5/2019光顧

之前在北角店食過覺得唔錯，想再去時已經關門。好彩從網友小臣的blog中知道小店於長沙灣重開，當然要再去。擇地重開，小店變得更小，無座位，要坐在街上。因為要等旁邊的店鋪關門後至可以在外set枱，小店喺晚上7點至開門。食物水準不俗，酸辣湯頭香甜，配料入味，可惜環境所限，未能發揮應有水準，店主已努力揾鋪，希望能早日入鋪，重新出發。

雞蛋腸粉 粉皮算薄，頗滑。豉油帶甜，不俗

自選湯粉 砂鍋米線酸辣湯加米線，大大碗，配料選豬腸及菜肉餃子。每碗湯粉都有肉碎同椰菜，米線有咬口，酸辣湯我選小辣，夠惹味。豬腸入味但唔夠肥，呀姐話下次可點肥腸，菜肉餃多菜少肉，一般。不過有好多隻。

食友的自選湯粉 都係大大碗，砂鍋米線豬骨雞清湯加米線，選豬潤、冬菇及蘿蔔做配料。清湯甜，豬潤滑，冬菇及蘿蔔入味，各方面都唔錯。

竹庶馬蹄水，自家煲，味道偏淡，細支左d。

店子小小，但選擇算多，粥粉麵小食煲仔都有

小店鋪面全部用作廚房，枱椅都放在街上，遲下大熱天時，真係未必頂到，希望小店早日揾到新鋪。原來小店之前在北角店因加租被迫結業，到觀塘店做左一陣又搬左來長沙灣，不過店主始終想搬回北角，希望佢早日達成心願。之後又再來，今次坐路中心，四圍空曠，居然有點風，真係好耐好耐無試過坐在街上食晚餐，感覺好懷舊。