Foodie 生活雜誌

2024克羅地亞遊 簡報篇

十七日十五夜的克羅地亞之旅，全程自駕遊，共停留六個地方。克國地型呈倒轉的L字，一邊係群山及湖景，另一邊係海景及島嶼，地貌豐富。主要景點係十六湖國家公園及不同的古城，有歷史有風景。克國係歐洲人的渡假熱點，對面就係意大利，沿海充滿地中海渡假風，喜歡玩水出海的朋友最啱。除此以外，克國亦係美食之國，出產松露、橄欖油、葡萄酒，可駕車四處參觀莊園，旅遊資源幾豐富。

總括而言，克國風景靚，民風友善，食物味道好，治安良好，係一個好適合渡假的地方👍🏻

航班 ： 香港無直航機往克國，我今次選乘阿聯酋，杜拜轉機，停留五小時，接flydubai，同一航厦，有足夠時間轉機，行李直掛至Zagreb ，全程共十九小時。廉航flydubai飛機來好新淨，我買國際線機票，有包飛機餐，但其他例如電視飲品小食一律付費，飛機無delay ，水準非常不俗，無網上講的差。

天氣 : 五月的克國太陽已好勤力，晚上八點幾至日落，天氣維持十零廿度，太陽勁曬，但喺陰頂地方及早晚清涼，天氣舒適。不過可想像暑假來到會熱死，一定要做足防曬，我今次都曬黑左幾度。

衣著 : 其本上T 恤短褲加件風褸就得。不過十六湖嗰邊就較凍，著薄羽絨都唔太過份。

食 : 餐廳食物普遍不俗，價錢合理，好多海鮮，烤魷魚最好味，可能近意大利，pizza、pasta都唔錯，碟頭大，平均每人20 euro已經食得幾好，所以今次都無乜點煮飯了。

住 : 六間住宿，全部兩房單位，包車位，有埋洗衣機洗衫，唔使帶咁多衫，住宿滿意。之前幾次去歐洲都訂airbnb，但今次發現booking.com的選擇多左好多，而且好多房源兩邊都有。我用開booking.com，所以五間經book.com訂，只有一間經airbnb訂。

租車 ： 除左喺Zagreb至機場兩程坐Uber，其餘全程自駕，短程坐uber都唔貴。去歐洲次次都經agent ‘rental cars’租車，有好多間租車公司揀，今次駕駛員揀Europe car ，無得指定車款，只比同grade的，比左架Toyota Hybird (見圖)，坐四人，尾箱僅夠放3件29”大行李加一件26”中行李，手提行李要放前座。我地買全保，乜都包，但還車時店員無check 車，按金要十至十五日至退回。

交通  : 克國的高速公路又新又靚，路費便宜，最長一段都係三十零euro，大部分用信用卡付款，只得一次要收現金。坐car ferry可先於網站買票，人同車都要買，開船前一小時到達碼頭排隊上車。

全程靠google帶路，入油全部自助，油費約1.4euro 1L。泊車有攞卡有入錶，大部份自助付費，可以用信用卡或入coins，通常1 euro一個鐘，旺季2-3 euro，入錶方法都有幾款，我入coins，通當先入錢再揀停留時間，攞飛放喺車頭就得，有d機有得找錢，有d無，有d要入埋車牌號碼，個錶有英文說明。提提大家，景點抄牌抄得幾勁，唔好搏。

電話卡 : 今次用3電話卡，10G可用30日，行5G，但通常只收到4G，部分時間更加係3G，但大致上無問題，夠我用足咁多日。

其他 : 基本上全程用信用卡付款，只需用小量現金，十幾日，四個人用唔到100 euro 現金。克國治安良好，我入黑後喺市內逛都唔驚，同一海之隔的意大利差得遠。大部分人識講英文，溝通全無問題 ，好多人都好友善，有問必答。