Foodie 生活雜誌

繼續斯奈山半島Snæfellsjökull之旅，其實整個半島圍圈行，除左已定的景點以外，見到有人停車的景點又死唔蝕底去睇下，加埋夜晚睇極光，全日行程超額完成，斯奈山半島Snæfellsjökull都算係一個不錯的旅遊點呢。

經過見到呢個火山，見有幾架車轉入去，當然二仔底死跟。題外話 : 話說出來時路口停左幾架車，我落車影張相，上車時竟然見到有個女士除哂褲喺度小便😱雖然有架車檔住，但行前行後一定睇到，我見到都嚇一大跳，因為真係乜都睇哂，邊上車邊呆呆地想 ： 真係急得咁淒涼？

火山有條鐵梯沿山而建

行上火山口，一個死火山

我見有兩個人係咁睇係咁影，應該係地質學家d friend，咁當然我又影張相，睇下有無blog友有興趣來

山頂的方向盤，指去邊呢？有寶藏嗎？

下一站 ： 黑沙灘Djúpalónssandur ，之前的黑沙灘Reynisfjara 有六角柱，呢個黑沙灘Djúpalónssandur 就有奇形怪狀的巨石，同大大舊的鵝卵石

從觀景台望落去好多有奇形怪狀的巨石，類似熔岩黑色城堡Dimmuborgir ，但我覺得呢度更自然

呢個窿聽講係地標，但當你睇左十日八日都係咁上下的景時，就會無乜感覺

沙灘上有船的殘骸，又有好多鵝卵石，原來當年的男丁若捧得到某一個重量的石就可以上船工作(我都係上網睇)

似怪石林

又見苔原

怪石群 Londrangar，似迪迪尼入面公主被幽禁的城堡

進入小鎮Arnarstapi，巨人Bárður歡迎你

沿住海岸綫散步，可以睇到海岸邊被浪濤拍打的玄武岩。

好大的海蝕洞，大自然的傑作，海鳥的遊樂場

行遠d仲可以影張企喺天然拱門頂的相

見到呢個牌行入去，兵分兩路，揸機的行左邊，擺pose的行右邊

揸機的小心點，跌落去就幫你唔到，不過我都見到有人行落一級影相，好驚險

影出來的效果，看似驚險 ，其實好安全，反而揸機嗰個危險d

小鎮上有幾間餐廳，應該唔錯，可惜未肚餓。亦可選擇住鎮上旅館

冰島秋冬圖-攝於某車的車身圖畫

晚餐回到住宿附近，原本有一間好靚的餐廳，可惜太后無興趣，只好草草食pizza就一餐

黃昏時回到草帽山瀑布睇下，偶遇來追極光的美國人，閒談間佢透露隻航拍機壞左，駕駛員立即表示關心，仲借左個parts比佢試機，來一張航拍機偶遇留影

一場來到觀極光熱點，點都要參予，聽講今晚好大機會睇到極光，全團人為表誠意，唔再喺屋hea住等，特登揸5分鐘車去無光害的草帽山附近等極光，幾大就幾大，燒賣就燒賣，十一點出發！由於太后習慣潑冷水，為免開口中唔老黎，出發前同佢約法三章，最後佢自發性唔出聲

百無聊賴，叫駕駛員幫我影下相，由於相機要暴光，所以我要企定定30秒影相，就在我企定定又眼定定時，突然見到一條幼幼如白色絲帶般的光束舞動，就知可能係極光。但另外三位團友都睇唔到。回來後睇番相，發現只係有我在內的兩張相至有極光，叫做留個紀念😁(其實肉眼完全睇唔到，張相只係用來呃like)