Foodie 生活雜誌

(一睇間餐廳外貌就喜歡)

4/2018光顧

由潮人主理的咖啡店，剛開業時只係喺中環select shop的一角，每次去到都有好多人，得幾個位，加上自己又唔夠型，所以一直無幫襯。估唔到生意愈做愈大，喺黃金地段灣仔及銅鑼灣設獨立分店。銅鑼灣店一向爆瀉，我反而喜歡永豐西街分店。呢一帶星街、月街、秀華坊都係我的漫步區域，好多味道不俗的餐廳，又有小店，四周都係型男美女，一個舒適小社區。餐廳以木為主的裝修，感覺cozy，座位較闊落，採光度足，好有休閒感，食物質素不俗，咖啡大大杯double shot，啱我。咪以為呢度會少人d，我假日10點到達就有位，但11點開始已坐滿，一樣咁受歡迎。

餐廳外唔多車，座在吧枱都有閒適感

室內採光度足，陽光灑進來，一室温暖

餐廳沿樓梯而建，樓底高，半層上，空間感更強

食物飲品選擇多

egg benedict 食材新，擺碟無需花考，只係食物顔色配搭已夠靚，三文魚、牛油果、雞蛋，黃橙綠，荷蘭汁味道清淡，但其他材料新鮮補數，不過唔喜歡用法包做底。

BLT sandwich 賣點都係食材，薯條用薯仔切條，口感好得多，不過撒鹽不均，中間好咸。

strawberry french toast 幾有驚喜，french toast 柔軟，cream 好滑，花生碎香，感覺好西洋，雖然唔多喜歡玉桂味，但都食左一塊，無加糖漿都夠味

咖啡大大杯，全部double shot，啱我，不過隻奶膩左d