Foodie 生活雜誌

(餐廳在合和中心對面，好旺)

2/2018光顧

而家的年輕人真係愈來愈本事，二十零歲已經可以喺灣仔黃金地段開設一間靚靚咖啡餐廳。餐廳用工業風裝修，開放式廚房有兩個大焗爐，好認真咁，咖啡corner 精緻的咖啡器具，絕對唔係家家酒式經營。早午市提供brunch，晚上改為酒吧咖啡館。睇得出係好比心機經營，店主對自己要求幾高，硬件做得好足，樣樣都經過精挑細選，但軟件似乎未到位，咖啡精緻，食物擺碟都好靚，可惜兩樣味道都唔突出，座位較迫，做唔出休閒感，侍應忙，洗手間所有要refill的都無。一間睇好過食的餐廳。

工業風的室內裝修，有hi end 感，職員的圍裙都有設計 ，似足日本仔cafe

開放式廚房同coffee bar喺餐廳一邊，另一邊係座位

充咖啡的係老闆，日系文青look

備長炭水

煙肉egg benedict 煙肉係烤五花腩，擺碟靚，五花腩又香又juicy，poach egg 靚仔，配菜係kale，麵包係apricot &walnut bread，厚得來柔軟，啖啖果肉，幾好味。 不過kela唔係人人啱食，見隔離枱成碟放喺度。

咖啡都有花臣搞，可以選fruity 或choco blend ，上枱時另有乾果伴飲，話可以帶出咖啡的味道，我唔知有咩分別，但飲落係香濃的。起碼叫做多幾粒嘢食下。

洗手間三大皆空，無厠紙、無抺手紙、無香氛