Foodie 生活雜誌

10/2017 光顧

新派中菜廳，地方雅緻，招呼好，點心精緻，食物味道好，但食完有點口渴，價錢貴，剩係個海景加兩舊，加上用熨斗熨枱布，加多三舊。

海蜇頭入味，沙薑豬手有咬口但唔硬，口感剛剛好。煎腸粉外皮香脆，加四川香辣醬，好惹味

蒸點的澄麵皮煙靱有嚼勁，皮薄饀靚，奶黃豬仔包賣相可愛，兩個豬頭都稍有不同，有心思

炸卡邦尼卷內裡係紫菜包蝦膠，炸得乾身，菠蘿叉燒餐包菠蘿皮焗得香脆，唔油膩，饀料係叉燒加鮮菠蘿，美味。

乾炒牛河望落立立令，但入口又唔覺油，牛肉軟稔適中，再配余均益辣醬，讚。鐵板叉燒。一碟貴價叉燒似乎已經成為各家貴價中菜館餐牌上的必備項目，食友每次必點，呢度的叉燒咬落唔會太稔，口感似番d正常叉燒，伴上甜豆，感覺懷舊。叉燒用鐵板上，剩係睇個侍應自由神像咁企喺度一手捧住塊鐵板，一手淋個汁落去，個氣勢都收一舊啦

甜品係楊枝甘露同杏仁茶 楊枝甘露足料清甜無澀味，very good，杏仁茶好多蛋白，稍甜。用LC小鍋上，女士至愛

海景加兩舊

枱布都要熨，呢d咪叫排塲