Foodie 生活雜誌

朝早趁王子仍熟睡中，食完早餐自己去田園行，天氣好好，獨享太陽花田。王子醒後就出發，出發前屋主知道我想去白金温泉，見佢偷笑一下，話只有遊客至去，話當地人都去遠少少的吹上温泉，我當然立即轉塲，所以今日的行程就係遊車河，食嘢同浸温泉。

一早去屋後田野行

好燦爛的太陽花

附近就係阿斗夢之丘。遊人坐高球車遊花園，佢在車上看風景，看風景的我在看佢。

原本想去呢間童話般的cafe食午餐，但仲有成個鐘至開，唯有先去其他地方埋食。

想食的餐廳無位，有位的又唔想食，結果睇番自己的遊記，揾番十年前去過的餐廳，寫遊記真係有用㗎！

餐廳一點都無變，我好好彩，一去到就有位，食完出來已排哂隊

菜單以蔬菜為主，北海道出品的蔬菜極優質，南瓜粟米好甜，番茄蜜瓜多汁，仍然好好味👍🏻

餐廳又係童話小屋feel

注意營業時間，美瑛的餐廳每年開好少日子

食完飯又回來童話cafe 飲咖啡

發呆

之後遊車河，見到有牌指入去呢度有商店，一去到先見到羊咩先生開餐

童話式建築的甜品店及餐廳

再來發呆

去浸温泉了，當然要上火山浸啦

從山腳到山頂了

到達！

我係温泉精，近年除左温泉旅館以外，若果自駕，會去揾d野湯或日歸温泉玩下，喺城市會去湯屋，浸過夠本

天然温泉，就算日本都愈來愈少了

都係一般日歸温泉格局，分男湯女湯，呢度仲有男女混浴，但反而要著泳衣至準入，好多一家大細來玩。女湯有好多個池，水夠熱，正👍🏻

温泉屋旁係露營地，好多人來露營，仲有車中泊

温泉屋內有廚房，可以煮食，幾過癮

呢度亦係登山口，好多人行完山就露營

真係會爆㗎

温泉屋外貌

日本人真係好開放，停車場已睇到温泉，不過放心，呢個係男湯，女湯喺最入，一定睇唔到

可以坐巴士來，請自行查詢班次

回家了

落番市中心，照例乜都關門，幾經辛苦揾到間燒肉店，諗住食餐好，點知肉就賣哂，得番齋麵😅