Foodie 生活雜誌

7/2021光顧

好友帶我食好嘢，開左幾個月的意大利餐廳，一睇個menu 好有Bombana 的影子，不過呢度晚餐價錢只能喺B店食午餐。食材高質，味道不俗，pasta 尤其好味，麵質彈牙，醬汁濃稠合度，讚👍🏻要帶喜歡食pasta的太后來一次。不過份量偏細。餐廳唔知係咪設計關係，聲音侷住左，嘈到街市一樣。最後要多謝朋友訂位及帶來美酒共享💕

麵包外皮脆，內裡軟綿綿有空氣感，上枱時仍熱到冒煙。grissini 酥脆出色，黑醋濃香，好味

點左Degustation Menu ，5個course，因為怕食唔哂，我地四個人點左三個set share，揀哂成個餐牌上的食物，好似試菜一樣。

Fassone tartare 意大利白牛肉，出名肉味濃，但我當晚食的tartare就覺得無乜味。不過因為我同朋友share ，夾開左食，若將成碟撈埋一齊相信會好食點，感覺自己浪費左美食。

藍龍蝦  龍蝦肉爽甜，Brittany 藍龍蝦真係永無甩轆。配濃厚龍蝦汁，好味。

牛仔肉醬寬條麵，麵條彈牙，肉醬juicy香濃，好味

紅蝦Chitarra 紅蝦係我最喜愛食的蝦，肉質甜嫩，蝦頭的蝦膏濃郁鮮甜，撈埋意粉食簡直一流，餐廳用料上成，出品水準高。

Black truffle 配雞油菌tagliatelle 侍應喺我面前打開裝住black truffle 銀器的蓋，香氣撲鼻。不過落左去意麵上又唔覺香。雞油菌味道香濃，簡單配意麵已好好食。

Mayura beef 之前喺bombana食過，好喜歡，肉味濃得來肉質柔軟，滿足哂我對牛肉的要求。配上味道濃郁的燉羊肚菌，菜式基本上同Bombana一樣，水準亦唔輸蝕。

Roasted kinki fish  魚肉充滿油香，魚皮煎得香脆，不過因為share食，每人食得一小啖，試唔出味，所以fine dinning 真係唔適宜share，食唔到最好的味道。

甜品 Melon雪芭好香melon味，配上日本及意大利蜜瓜，好清新

白桃雪芭就一般

Petit fours 的berry cone 同朱古力都好味

朋友帶來的美酒好飲，可惜戰鬥力太弱，最後一枝無開，但朋友話最好飲，今次無緣一試

餐廳喺酒店地鋪，餐廳法式格調裝修，幾幅大油畫作點綴，清淡高雅

午市餐牌