Foodie 生活雜誌

最喜歡週末來一個豐富早餐，慢慢嘆，好享受。餐廳的egg benedict 幾出名，我係班尼迪粉絲，當然要試。單點$148，套餐$188包菓汁，甜品同茶，唔洗諗，一定係套餐，飽死至算。結果一條友睇下書，慢慢食左三個鐘，其實即係brunch，抵哂。

先來一杯鮮搾蘋果汁 (另外可選橙汁)

egg benedict 個沙律dressing 味道好特別，一問之下，原來係綠茶醋。用藍梅，藍菊花，綠茶浸入醋中。酸得來有種香味，又帶點咸，味道奇特。Benedict 上的荷蘭汁係啡色，食到有菇味，少見，又問。原來係磨菇加芥辣汁，侍應話餐廳有廠房獨立製作各款醬汁，好似幾勁，唔問都唔知。

dessert 選侍應推介的cream burlee ，話係簽名甜品。一般食開係杯狀，呢個係cake 狀，中間有紅苺，係比一般的cream burlee 無咁漏，但因為太大件，食食下都滯，無謂出錢又出命，最後四份一都要放棄。

嚟到當然要飲茶 想飲White earl grey ，但侍應話要加$110，攞我條命好過，直接坦白話飲唔起，侍應就介紹呢隻Earl Grey Buddha ，earl grey 加綠茶，茶清，淡淡的earl grey 味，中和甜品的甜膩，滿足的一餐。